काठमाडौ । नेपाली फिल्मका एक्सन सुपरस्टार निखिल उप्रेती चुनावी प्रचारमा सर्लाहीमा पुगे । प्रदेश नम्बर २ का ८ जिल्लामा असोज २ गते हुन लागेको स्थानिय तहको निर्वाचनका लागि सर्लाहीमा रहेका निखिलले एमालेकी उम्मेदवार कल्पना कटुवालका लागि भोट मागे । कल्पना रुद्रका नायक विश्व शर्माकी आमा हुन् । बरहथवा नगरपालिकाको मेयर पदमा उम्मेदवारी दिएकी कल्पनाका लागि निखिलले घरदैलो कार्यक्रम गरेर भोट मागे ।
निखिलका दाई हरि उप्रेती सर्लाही क्षेत्र नम्बर ३ का निर्वाचित एमाले सांसद हुन् । यसअघि सांसदमा आफ्नो दाजुलाई जिताउन सर्लाही पुगेर भोट मागेका निखिलले अहिले कल्पना कटुवालको जितका लागि घरदैलो कार्यक्रममा दौडेका हुन् । उनले आफ्नो दाई एमालेको सांसद भएपनि आफू राजनीतितर्फ जाने सोच नभएको बताएका छन् ।
पटक–पटक एमालेका उम्मेदवारलाई भोट हाल्दै आइरहेका निखिलले घरदैलो कार्यक्रमको क्रममा कल्पना कटुवालको जित सुनिश्चित रहेको दाबी गरेका थिए । असोज २ गते मतदान गरेपछि उनी काठमाडौ फर्किनेछन् । फिल्मिखबरबाट
प्रकाशित मितिः २०७४ असोज १
वि.सं.२०७४ असोज १ आइतवार १६:१६ मा प्रकाशित