काठमाडौ । नेको इन्स्योरेन्सले ३९ करोड २० लाख रुपैयाँ बराबरको हकप्रद सेयर बिक्री गर्ने भएको छ । इन्स्योरेन्सले माघ २६ गते शुक्रबारदेखि दुई बराबर एकको अनुपातमा हकप्रद शेयर बिक्री खुला गरेको छ ।
कम्पनीले एक सय रुपैयाँ अंकित दरका ३९ लाख २० हजार ९२८ कित्ता सेयर बिक्री खुला गरेको हो । कम्पनीले निष्कासन गरेको हकप्रदमा माघ ८ गतेसम्म कायम सेयरधनीहरुले आवेदन गर्न पाउनेछन् । कम्पनीको शेयर निष्कासन तथा बिक्री प्रबन्धकमा एनएमबि क्यापिटल रहेको छ ।
हाल कम्पनीको चुक्ता पूँजी ७८ करोड ४१ लाख ८५ हजार रुपैयाँ छ । हकप्रद निष्कासन तथा बाँडफाँड पश्चात कम्पनीको चुक्ता पूँजी एक अर्ब १७ करोड ६२ लाख ७८ हजार रुपैयाँ पुग्नेछ ।
इन्स्योरेन्सका सेयरधनीले आस्वा सेवा प्राप्त जुनसुकै बैंक तथा वित्तीय संस्था र तीनका शाखा कार्यालय, एनएमबि क्यापिटल र एनएमबि बैंकका सबै शाखा कार्यालयबाट समेत हकप्रद सेयरका लागि चैत १ गतेसम्म आवेदन गर्न सक्नेछन् ।
चालू आवको प्रथम त्रैमासमा कम्पनीले तीन करोड ६१ लाख रूपैयाँ खुद नाफा कमाएर प्रतिसेयर आम्दानी २० रूपैयाँ ३० पैसा कायम गरेको छ । कम्पनीको सेयर विहीबार प्रतिकित्ता ५७० रूपैयाँमा कारोबार भएको छ ।
२०७४ माघ २६ गते प्रकाशित
वि.सं.२०७४ माघ २६ शुक्रवार १७:०५ मा प्रकाशित
