काठमाडौँ । नयाँ अर्थमन्त्रीलाई स्वागत स्वरुप हरियो झण्डाले केही आशाको संकेत गरेको सेयर बजार एक दिन पनि टिक्न नसकी लालझण्डा फहराउन पुगेको छ । बुधबार सेयर बजारमा आएको तिब्र गिरावटले यो संकेत गरेको हो । यसले लगानीकर्तालाई निराश बनाएको छ ।
केही दिनमा तिब्र रुपले बढ्ने अनि सोही गतिमा तल झर्ने प्रवृत्तिका कारण लगानीकर्ता पर्ख र हेरको अवस्थामा पुगेका छन् । यद्यपी कारोबार रकममा देखिएको स्थिरताले केही आशावादी बनाएको छ ।
बजार बढेको संकेत पाउने बित्तकै ठुलो संख्यामा सेयर बोकेर बसेकाहरु एकाएक सेयर बेच्न उत्रिँदा सामान्य लगानीकर्ता फस्ने गरेका छन् । बजार सुधारको संकेतसँगै केही दिन यता कारोबार रकम बढे पनि कारोबारीहरुको सक्रियताले तल झर्न थालेको हो । यस क्रममा बुधबार मात्र बजार परिसुचक नेप्सेमा १८.८२ अंकको गिरावट आएको छ ।
बजार खुलेदेखि नै ओरालो लाग्ने क्रममा सूचक १३४५.९९ अंकमा पुगेर अडिएको छ । १६० कम्पनीका १३ लाख ३७ हजार ३३७ कित्ता सेयर ५ हजार २५९ पटक कारोबार हुँदा ५४ करोड ३४ लाख ३१ हजार ५८३ रुपैंयाको सेयर किनबेच भएको छ । अघिल्लो दिनको तुलनामा कारोबार रकममा झण्डै डेढ करोड रुपैंयाले गिरावट आएको छ ।
बुधबार कारोबारमा आएका सबै कम्पनीका उपसमुहहरु तल झरेका छन् । बजारमा आएको गिरावटसँगै बजार पूँजीकरणमा पनि गिरावट आएको छ । अघिल्लो दिन १५ खर्ब ९६ अर्ब रुपैंया रहेको पूँजीकरण बुधबार १५ खर्ब ७४ अर्ब रुपैंयामा झरेको छ ।
२०७४ फागुन १६ गते प्रकाशित
वि.सं.२०७४ फागुन १६ बुधवार १६:३३ मा प्रकाशित
