काठमाडौं । प्रधानमन्त्री केपी शर्मा ओलीले ३७ अर्व घाटामा रहेको नेपाल वायुसेवा निगमको व्यवस्थापनमाथि सरकारले विश्वास गर्न नसक्ने भन्दै यथास्थितिमा नेपाल वायुसेवा निगमलाई एक पैसा पनि दिन नसकिने बताएका छन् ।
निगमको ६१ औं वार्षिकोत्सवको अवसरमा सोमबार काठमाडौंमा आयोजित कार्यक्रममा बोल्दै उनले तत्काल निगमको समग्र कामकार्वाहीमा सुधार नभए सरकार त्यसको संचालनका लागि रणनीतिक साझेदार खोज्न बाध्य हुने स्पष्ट पारेका छन् । ‘निगमको व्यवस्थापन र संचालनमा तत्काल सुधार आउनु प¥यो, नभए त्यसको संचालनका लागि सरकार रणनीतिक साझेदार खोज्न बाध्य हुनेछ,’ उनले भने । साथै उनले प्रश्न गरे, ‘निजी क्षेत्रले चलाउन सक्ने विमान निगमले किन चलाउन सक्दैन ?’
सरकारले साथसहयोग दिए पनि निगमले विमान संचालन गर्न नसकेकोमा आक्रोश व्यक्त गरेका छन् भने वाइडबडी विमान चलाउनका लागि निगमले गन्तव्य खोज्न नसकेकोमा आपत्ति जनाएका थिए । प्रधानमन्त्री ओलीले निगमको विमान उडान भर्नका लागि युरोपियन मुलुकहरुसँग पनि कुरा गरेको उल्लेख गर्दै विमानहरुलाई चुस्त राख्न सचेत गराए । आकाशमा हुनुपर्ने विमानले एयरपोर्ट मात्रै ओगटने गरेकोमा प्रधानमन्त्री ओलीले असन्तुष्टि जनाए ।
प्रधानमन्त्री ओलीले निगमलाई आवश्यक बजेट दिन सकिने तर त्यसका लागि व्यवस्थापनमा सुधार हुनुपर्ने स्पष्ट पारे ।
२०७६ असार १६ गते प्रकाशित
वि.सं.२०७६ असार १६ सोमवार १२:५६ मा प्रकाशित
