कठमाडौं । चालू आर्थिक वर्ष्भित्र वाणिज्य बैंकहरूले ६३ अर्ब रुपैयाँको ऋणपत्र जारी गर्ने तयारी गरिरहेका छन । वाणिज्य बैंकहरूको ऋणपत्रले वित्तीय र सेयर बजारमा सकारात्मक असर पार्न सक्छ ।
तर, नेपाली सेयरको दोस्रो बजारमा भने हालसम्म ऋणपत्रको कारोबार सक्रिय हुन सकेको छैन । गत आव यस्ता संस्थागत ऋणपत्रको कारोबार दुईपटक मात्र भएको थियो ।
राष्ट्र बैंकले आगामी असार मसान्तभित्र वाणिज्य बैंकहरूले आफ्नो चुक्ता पुँजीको न्यूनतम २५ प्रतिशतबराबर अनिवार्य ऋणपत्र जारी गर्नुपर्ने व्यवस्था गरेको छ ।
वाणिज्य बैंकहरूले २५ प्रतिशत ऋणपत्र जारी गर्दा हालको चुक्ता पुँजी २ खर्ब ५२ अर्बका आधारमा बजारमा ६३ अर्ब रुपैयाँको ऋणपत्र निष्कासन हुनेछ ।
नेपाल स्टक एक्सचेन्ज (नेप्से)को तथ्यांकअनुसार गत आवमा १३ अर्ब ३४ करोडको ऋणपत्र कारोबार भएको थियो ।त्यसमध्ये संस्थागत ऋणपत्रको दुईपटक कारोबार भएको हो ।
यस अवधिमा ‘सानिमा बैंक ऋणपत्र २०८५’ को दुईपटक कारोबार भएर ४२ हजार रुपैयाँको ऋणपत्र किनबेच भएको छ ।
नेप्सेमा कुल ९ अर्ब २ करोड रुपैयाँको संस्थागत ऋणपत्र सूचीकृत छ ।
सो अवधिमा कारोबार भएका अन्य सबै सरकारी विकास ऋणपत्र हुन । सरकारका लागि राष्ट्र बैंकले विकास ऋणपत्र निष्कासन गर्ने गर्छ । नयाँ पत्रिका दैनिकमा समाचार छ ।
२०७६ भदौ १० गते प्रकाशित
वि.सं.२०७६ भदौ १० मंगलवार ११:४० मा प्रकाशित
