गोरखा । १६ किलो सुनसहित पक्राउ परेका गोरखा केरौंजाका धनकमल गुरुङविरुद्ध राजस्व अनुसन्धान विभागले ३५ करोड रुपैयाँ जरिवाना माग दावी गर्दै जिल्ला अदालत गोरखामा मुद्दा दर्ता गरेको छ ।
सुन तस्करीसम्बन्धी अनुसन्धान सकेर विभागले मिसिल र अभियोगपत्र मंगलबार जिल्ला अदालत गोरखामा पठाएको श्रेस्तेदार विनोदप्रसाद अधिकारीले जानकारी दिनुभयो ।
’राजस्व अनुसन्धान विभागबबाट अनुसन्धान सम्बन्धी हालसम्म तयार भएको सम्पूर्ण मिसिल र अभियोग पत्र यहाँ पठाएको छ,’ श्रेस्तेदार अधिकारीले भन्नुभयो, ’प्रतिवादीविरुद्ध राजस्व चुहावट तथा विदेशी विनिमय अपचलनसम्बन्धी मुद्दा दर्ता गरी अनुसन्धान भइरहेको छ ।’
राजस्व अनुसन्धान विभागले राजस्व चुहावट (अनुसन्धान तथा नियन्त्रण) ऐन २०५२ तथा विदेशी विनिमय नियमित गर्ने ऐन २०१९ अनुसार मुद्दा दर्ता गराएको उहाँले बताउनुभयो ।
गत साउन ९ गते १६ किलो सुनसहित पक्राउ परेका धार्चे गाउँपालिका–१ हुलचुकका गुरुङविरुद्ध ३५ करोड ६६ लाख ७२ हजार रुपैयाँ जरिवाना गर्न माग गरिएको छ ।
प्रतिवादी गुरुङलाई आर्थिक जरिवानासहित ६ वर्ष कैद सजाय हुन पनि राजस्व अनुसन्धान विभागले माग गरेको छ । बरामद भएको सुनको मुल्य आठ करोड ९१ लाख ६८ हजार रुपैयाँ कायम भएको छ । प्रतिवादी धनकमल गुरुङले बयानमा लोप्साङ लामा भन्ने व्यक्तिबाट आफूले सुन लिएको बयान दिएका छन ।
जिल्ला प्रहरी कार्यालय गोरखाले सुनसहित मुख्य आरोपित धनकमल गुरुङलाई साउन १० गते राजस्व अनुसन्धान विभागको जिम्मा लगाएको थियो । विभागले एक महिनाभन्दा बढी समय लगाएर अनुसन्धान पूरा गरी जिल्ला अदालत गोरखामा मुद्दा दर्ता गरेको हो ।
विभागले पठाएको अभियोगपत्र अनुसार प्रतिवादी धनकमल गुरुङसँग मंगलवारै बयान गरिएको जिल्ला अदालतका स्रेस्तेदार विनोदप्रसाद अधिकारीले बताउनुभयो । अन्नपुर्ण पोष्टबाट
२०७६ भदौ १८ गते प्रकाशित
वि.सं.२०७६ भदौ १८ बुधवार १५:३३ मा प्रकाशित
