काठमाडौं । राष्ट्रिय सूचना आयोगले एक जना प्रमुख सूचना आयुक्त र दुई जना आयुक्त माग गरेको छ । आयोगका पदाधिकारी नियुक्ति सिफारिस समितिको सचिवालयले बिहीबार सूचना निकालेर इच्छुकबाट आवेदन माग गरेको हो ।
सूचनाको हकसम्बन्धी ऐन २०६४ ले सूचनाको हकको संरक्षण, सम्बर्द्धन र प्रचलनको लागि सूचना आयोगको व्यवस्था गरेको छ ।
ऐनको दफा ११ अनुसार आयोगमा एक प्रमुख आयुक्त र दुई जना आयुक्त रहन्छन । ‘आयोगका पदाधिकारीहरूको पदावधि समाप्त हुने क्रममा रहेकोले रिक्त हुने पदहरूमा योग्य र उपयुक्त व्यक्तिहरूको नियुक्तिका लागि इच्छुक उम्मेदवारहरूबाट आवेदन माग गर्ने निर्णय’ सिफारिस समितिले गरेको हो ।
मंसिर १९ गतेभित्र इच्छुकले सिफारिस समितिको कार्यालय देवीनगर काठमाडौंमा आवेदन दिन सकिने समितिले जानकारी दिएको छ ।
आयोगका लागि कम्तिमा स्नातकोपाधि हासिल गरेको, आमसञ्चार, कानुन न्याय, सार्वजनिक प्रशासन, सूचना प्रविधि वा व्यवस्थापनको क्षेत्रमा कम्तिमा १५ वर्षको अनुभव हासिल गरेको हुनुपर्ने योग्यता छ । ६५ वर्ष उमेर ननाघेको नेपाली नागरिकले आवेदन दिन सक्नेछन।
२०७६ मंसिर १२ गते प्रकाशित
वि.सं.२०७६ मंसिर १२ बिहीवार ११:४३ मा प्रकाशित