काठमाडौं । स्वाभिमान लघुवित्त वित्तीय संस्था लिमिटेडले तेस्रो वार्षिक साधारण सभा माघ १० गते बोलाएको छ । कम्पनीले डार्सिज इन्टरनेशनल होटल, बुटवलमा बिहान ११ बजे सभा बोलाएको हो ।
कम्पनीको पुस १६ गते बसेको सञ्चालक समितिको बैठकले सो मितिमा सभा गर्ने निर्णय गरेको हो । कम्पनीले सभामा सञ्चालक समितिले प्रस्ताव गरे बमोजिम २४ प्रतिशत बोनस शेयर र १ दशमलव २७ प्रतिशत नगद लाभांश (कर प्रयोजनको लागि) वितरण गर्ने प्रस्ताव पारित गर्ने भएको छ ।
साथै, कम्पनीले बोनस शेयर वितरणपश्चात कायम हुन आउने जारी तथा चुक्ता पूँजीको ३३ दशमलव ३३ प्रतिशत अर्थात ३ बराबर १ अनुपातमा हकप्रद शेयर जारी गर्नेछ ।
साधारण सभाको अन्य प्रस्तावमा सञ्चालक समितिमा सर्वसाधारण शेयरधनीहरुको तर्फबाट २ जना सञ्चालकहरुको निर्वाचन गर्ने र १ जना स्वतन्त्र सञ्चालकको नियुक्ति गर्ने र अन्य लघुवित्तसँग मर्जर वा प्राप्ति गर्ने सम्बन्धि सम्पूर्ण कार्य गर्ने सञ्चालक समितिलाई अख्तियारी दिने विषयहरु रहेका छन् ।
साधारण सभा प्रयोजनको लागि कम्पनीको शेयरधनी दर्ता पुस्तिका पुस २५ गतेदेखि माघ १० गतेसम्म बन्द हुने भएको छ । यस अनुसार पुस २४ गतेसम्म नेप्सेमा कारोबार भई कायम शेयरधनीहरुले कम्पनीको साधारण सभामा भाग लिन तथा लाभांश प्राप्त गर्न सक्नेछन् ।
२०७६ पुस १७ गते प्रकाशित
वि.सं.२०७६ पुस १७ बिहीवार १०:३३ मा प्रकाशित
