काठमाडौं । अर्थमन्त्री डा. युवराज खतिवडाले पदबाट राजीनामा दिनुभएको छ । राष्ट्रियसभा सदस्यको पदावधि मंगलबार सकिनुअघि उनले पदबाट राजीनामा दिनुभएको हो ।
संसद नरहेको व्यक्ति मन्त्री हुन पाउँदैन तर राजीनामा पछि भने ६ महिनासम्म मन्त्री हुन पाउने संवैधानिक व्यवस्था छ । सोही व्यवस्थाअनुसार उहाँ पुनः मन्त्री बन्न लाग्नुभएको हो ।
राजीनामा लगत्तै प्रधानमन्त्री केपी शर्मा ओलीले खतिवडालाई मन्त्रीमा पुनर्नियुक्त गर्नुहुनेछ । राष्ट्रियसभा सदस्य मध्ये दुई वर्षे कार्यकाल पूरा गरेका १९ जनाको पदावधि मंगलबार मध्यराती सकिँदैछ ।
गोलाप्रथाबाट दुई वर्षे कार्यकाल पाउनुभएका अर्थमन्त्री खतिवडाले राजीनामा दिनुभएको हो । खतिवडा नेपाल राष्ट्र बैंकका पूर्वगभर्नर हुनुहुन्छ।
वि.सं.२०७६ फागुन २० मंगलवार १६:२४ मा प्रकाशित
