काठमाडौं । आइतबारदेखि उपत्यकामा गाडी चाउन ‘टाइम कार्ड’ लागू हुने भएको छ । जुनसुकै कार्यालय वा संस्थाका सवारी साधन तोकेको समयमा मात्र चलाउन पाउने महानगरीय ट्राफिक प्रहरी महाशाखा प्रमुख भीमप्रसाद ढकालले जानकारी दिनुभयो।
हिजो काठमाडौं उपत्यकाका सिडिओ, सुरक्षा निकायका डिआइजी र महाशाखाबीच भएको बैठकले निर्णय गरेको हो र गृह मन्त्रालयले पनि स्वीकृति दिइसकेको उहाँले भन्नुभयो ।
सरकारी कार्यालयलाई बिहान ९ बजेदेखि साढे १० बजेसम्म र घर फर्कन बेलुकी ५ बजेदेखि ६ बजेसम्म समय निर्धारण गरिएका छ । त्यस्तै, तरकारी तथा अत्यावश्यक खाद्य सामग्री बिहान १० बजेभन्दा पहिल्यै ढुवानी गरिसक्नुपर्ने उहाँले बताउनुभयो ।
त्यसैगरी बैंक, वित्तीय संस्था बिहान ९ बजेदेखि साढे १० बजेसम्म गइसक्नुपर्ने र बेलुका साढे ३ बजेदेखि ५ बजेसम्म फर्कनु पर्ने ढकालले जानकारी दिनुभयो ।
कुनै अत्यावश्यक काम परेर निस्कनु परेमा प्रहरीलाई जानकारी गराउनुपर्ने उहाँले बताउनुभयो । ‘बजारमा हल्ला भएको जस्तो बिनाकाम निस्कन पाउने होइन। ।सरकारले तोकेको संस्थाहरू पनि सामाजिक दूरी कायम गरेर तोकेको समयमा मात्र यात्रा गर्नुपर्छ,’ उहाँले भन्नुभयो ।
वि.सं.२०७७ वैशाख २७ शनिवार १८:१० मा प्रकाशित