काठमाडौं । यसपाली कुनै पनि बैंकका कर्मचारीले साउन १ गते बोनस नपाउने भएका छन् । कोरोनाका कारण बैंकले पैसा उठाउन नसकिरहेकाले साउन १ गते नै कर्मचारीहरुले बोनस नपाउने भएका हुन् ।
हिजोका दिनहरुमा समय सामान्य भएकोले बैंकमा पैसा सहजै उठ्ने अवस्था थियो । तर अहिले कोरोना भाइरसका कारण पैसा उठ्छ कि उठ्दैन, कहिले उठ्छ भन्ने यकिन छैन । त्यसैले बोनस बाँड्न गाह्रो भएको बैंकर्स संघले जनाएको छ । नगदमा नआएको तथा पाकेको ब्याज आम्दानीलाई राष्ट्र बैंकले रेगुलेटरी रिजर्भमा लैजाने ब्यवस्था छ ।
साथै ऋण तिर्न समय दिए पनि त्यसको जोखिम बहनका लागि निश्चित प्रतिशत नोक्सानी ब्यवस्थापन (प्रोभिजनिङ) गराउने तयारी पनि राष्ट्र बैंकले गरेको छ । त्यसैले मौद्रिक नीति गर्नुपर्ने बाध्यता भएको बैंकर्सको भनाइ छ ।
साउन १ गते नै कर्मचारीलाई बोनस दिने चलन नबिल बैंकले सुरु गरेको थियो । त्यसपछि नबिल बैंकको सिको गर्दै अन्य बैंकले पनि कर्मचारीलाई साउन १ गते निश्चित समयको बोनस दिँदै आएका थिए ।
आर्थिक बर्ष सकिएको भोलिपल्ट बैंकहरुले कर्मचारीलाई निश्चित अवधिको बोनस खातामा हाल्दिने चलन थियो । बैंकले अघिल्लो दिन उठेको पैसाका आधारमा कर्मचारीलाई बोनस दिने चलन थियो ।
वि.सं.२०७७ असार ३० मंगलवार १२:५४ मा प्रकाशित
