काठमाडौं । नयाँ आर्थिक वर्षको पहिलो दिन साउन १ गते नेपालको शेयर बजार हरियो भएर बन्द भएको छ । यस दिन नेप्से परिसूचक ३२ दशमलव ४२ प्रतिशत बढेर १ हजार ३९४ दशमलव ७७ विन्दुमा पुगेको छ ।
२ दशमलव ३८ प्रतिशत बढेको बजारमा रू. १ अर्ब ४ करोड १७ लाख ७० हजार बराबरको कारोबार भएको छ । कारोबार रकम पनि असार ३१ गतेको तुलनामा थोरै बढेको छ ।
असार ३१ गते बुधवार रू. १ अर्ब १६ करोड ४ लाख ९१ हजार बराबरको कारोबार भएको थियो ।कोरोना संक्रमण पश्चात करीब ९८ दिनपछि असार १५ गतेदेखि निरन्तर रुपमा सञ्चालन भैरहेको शेयर बजारले बुलिस ट्रेण्डको गति लिएको जानकारहरु बताउँछन् ।
लामो समय घटेको बजार सुधारका लागि सम्बद्ध पक्षहरुले आ–आफ्नो तर्फबाट पहल गरेका कारण बजारमा सकारात्मक प्रभाव परेको जानकारहरुको बुझाई छ ।
पछिल्लो समय बैंकमा लगानीयोग्य पूँजीको प्रयाप्तता, कम व्याजदर, घरमै बसेर कारोबार गर्न सक्ने वातावरण लगाएतले बजारले गति लिएको र आगामी दिनमा पनि बजारमा सकारात्मक प्रभाव पार्ने खालका विषयहरु सम्बोधन हुने सम्भावना रहेकाले बजार बढ्ने अनुमान विश्लेषकहरुले लगाएका छन् ।
साउन १ गतेको कारोबारमा सबैभन्दा बढी नेपाल पुनर्बीमा कम्पनीको शेयर कारोबार भएको छ । उक्त कम्पनीको प्रतिकित्ता रू. ५२१ मा रू. ९ करोड ४१ लाख ७२ हजार बराबरको कारोबार भएको हो । दोस्रो बजारमा कारोबार शुरु भएको छैठौं दिन पनि एनआईसि एशिया लघुवित्तको शेयरमूल्यमा सकारात्मक सर्किट लागेको छ ।
यस दिन कम्पनीको शेयरमूल्य रू. ५३ ले वृद्धि भएको छ । बिहीवारको कारोबारमा मितेरी डेभलपमेण्ट बैंकको शेयरमूल्य पनि ९ दशमलव १२ प्रतिशत अर्था रू. २८ ले बढेको छ । दोहोरो अंकले बढेको बजारमा ४५ ओटा कम्पनीको शेयरमूल्य घटेको छ ।
यस दिन ओरियण्टल होटल र राधी विद्युत् कम्पनीका शेयरधनीहरुले सबैभन्दा बढी गुमाएका छन् ।यो दिन ओरियण्टल होटलको शेयरमूल्य रू. २१ र राधी विद्युत् कम्पनीको शेयरमूल्य रू. ९ ले घटेको छ । साउन १ गतेको कारोबारमा १२ ओटा समूहकै परिसूचक हरियो देखिएको छ ।
यस दिन बैंकिङ् समूहको ३ दशमलव ५६ प्रतिशत, व्यापारिक समूहको १ दशमलव ५९ प्रतिशत, होटल समूहको शून्य ८४ प्रतिशत, विकास बैंकको ३ दशमलव ५१ प्रतिशत, जलविद्युत् समूहको १ दशमलव शून्य ३ प्रतिशत, वित्त समूहको २ दशमलव ५७ प्रतिशत, निर्जीवन बीमा समूहको १ दशमलव २७ प्रतिशत, उत्पादन तथा प्रशोधन समूहको १ दशमलव ६९ प्रतिशत, अन्य समूहको शून्य दशमलव ८८ प्रतिशत, लघुवित्त समूहको शून्य दशमलव २७ प्रतिशत, जीवन बीमा समूहको १ दशमलव ६२ प्रतिशत र म्युचुअल फण्ट समूहको शून्य दशमलव २६ प्रतिशत परिसूचक बढेको हो ।-आर्थिक अभियानबाट
वि.सं.२०७७ साउन १ बिहीवार १५:३० मा प्रकाशित