काठमाडौं । नेपाल बैंकर्स संघले सामाजिक सञ्जाल (सोसियल मिडिया) मार्फत आग्रह गरेको आधारमा मात्र कुनै पनि व्यक्ति तथा कम्पनीको नाममा पैसा स्थानान्तरण (ट्रान्सफर) नगर्न अनुरोध गरेको छ ।
पछिल्लो केही समयमा सोसियल मिडियाको प्रयोग गरी विभिन्न नक्कली (फेक) अकाउन्ट खोली सहयोग माग्ने क्रियाकलाप बढेकाले यसप्रति बैंकहरुलाई सचेत गर्दै संघले आइतवार एक सूचनामार्फत यस्तो अनुरोध गरेको हो ।
संघले जारी गरेको सूचनामा कतिपय अवस्थामा अनधिकृत खाताहरु छुट्टयाउन गाह्रो हुने भएकोले सम्बन्धित व्यक्तिर कम्पनीसँग प्रत्यक्ष रुपमा यकिन गरिसके पछि मात्र कुनै पनि प्रकारको आर्थिक क्रियाकलाप गर्न र यस विषयमा थपसचेत रहन आवश्यक रहेको उल्लेख छ ।
यससँगै संघले आम सरोकारवालाहरुले आफ्नो खाता सम्बन्धी विवरण, पिन नम्बर, मोबाइल तथा इन्टरनेट बैंकिङ्ग सम्बन्धी विवरणहरु आदिसमेत कसैसँग सेयर नगर्न पनि भनेको छ ।
वि.सं.२०७७ साउन १८ आइतवार १६:०६ मा प्रकाशित