जनकपुरधाम । कोरोना संक्रमण तीव्र रुपमा फैलिरहेकोले सावधानी अपनाउन प्रदेश २ को रौतहटमा पनि साउन २४ गतेदेखि ३२ गतेसम्मका लागि निषेधाज्ञा जारी गरिएको छ ।
कोरोना संक्रमणलाई मध्यनजर गर्दै रौतहटमा पनि निषेधाज्ञा जारी गर्न लागिएको हो। साउन २४ गते शनिवार बिहान ६ बजेदेखि लागू हुने गरी साउन ३२ गते आइतवारसम्मका लागि निषेधाज्ञा जारी गरिएको रौतहटका प्रमुख जिल्ला अधिकारी बासुदेव घिमिरेले जानकारी दिए ।
प्रजिअ घिमिरेले कोरोना संक्रमणको प्रभावकारी रोकथाम तथा नियन्त्रण र यसको संक्रमण फैलिन नदिनका लागि जिल्लाभरी प्रतिकूल प्रभाव पर्नसक्ने गतिविधिमा रोक लगाइने बताए।
उनले नेपाल राजपत्रमा तोकिएको अत्यावश्यक सेवाहरु बाहेकका अन्य सबै सेवा र स्थलहरु साउन ३२ गते राति १२ बजे सम्मका लागि स्थानीय प्रशासन ऐन, २०२८ को दफा ६ (३) र संक्रामक रोग ऐन २०२० को दफा २ बमोजिम जिल्ला सुरक्षा समितिको निर्णय अनुसार रौतहट जिल्लाभरी निषेधाज्ञा जारी गरिएको जानकारी दिए ।
वि.सं.२०७७ साउन २१ बुधवार १८:१७ मा प्रकाशित
