काठमाडौं । सजिलो र समिट लघुवित्त एक अपसमा मर्ज भएर आज मंगलबार (असोज ६ गते) बाट एकीकृत कारोबार सुरु गरेका छन् ।
मर्जपछि समिट लघुवित्त वित्तीय संस्थाको नामबाट एकीकृत कारोबार सुरु भएको हो । मर्जपछि यस लघुवित्तको केन्द्रीय कार्यालय गोरखा नगरपालिका वडा नं १३, मझुवा देउरालीमा रहनेछ ।
दुवै कम्पनीलाई एकीकृत कारोबार गर्न नेपाल राष्ट्र बैंकले भदौ ७ गते र कम्पनी रजिष्ट्रार कार्यालयले भदौ २८ गते अन्तिम स्वीकृति दिएका थिए । दुवै कम्पनीको असार ३१ गते सम्पन्न विशेष साधारण सभाले १ः१ अनुपातमा मर्ज हुने प्रस्ताव पारित गरेका थिए ।
सजिलो लघुवित्तसँग मर्जरमा जाने सम्झौता गरेपछि माघ २३ गतेदेखि समिटको सेयर कारोबार रोक्का छ । समिट लघुवित्त १५ जिल्ला कार्यक्षेत्र भएको नेप्सेमा सूचीकृत कम्पनी हो भने सजिलो लघुवित्त नेप्सेमा सूचीकृत नभएको एक राष्ट्रियस्तरको कम्पनी हो ।
हाल समिटको चुक्ता पुँजी २१ करोड रुपैयाँ रहेको छ । यस्तै, सजिलोको चुक्ता पुँजी १४ करोड ८९ लाख रुपैयाँ छ ।
वि.सं.२०७७ असोज ६ मंगलवार ०९:४५ मा प्रकाशित