काठमडौं । माछापुच्छ्रे बैंकले आफ्नो वार्षिक साधारण सभा डाकेको छ ।
बैंकले गत आवको मुनाफाबाट लगानीकर्ताहरुलाई दिने भनेको १० प्रतिशत लाभांश प्रस्ताव पारित गर्ने विषेश प्रस्तावका साथ उक्त सभा बोलाएको हो ।
यस अघि बैंकको सञ्चालक समितिले लगानीकर्ताहरुलाई चुक्ता पूँजीको ७.०३ प्रतिशत अर्थात ५९ करोड ४६ लाख १६ हजार ९३१ रुपैयाँ बराबरको बोनस शेयर र ३.७३ प्रतिशतका दरले बोनस तथा नगद लाभांशमा लाग्ने कर सहित २८ करोड ५० लाख ६४ हजार ७४४ रुपैयाँ बराबरको नगद लाभांश वितरण गर्ने प्रस्ताव गरेको थियो ।
उक्त सभामा अन्य उपयुक्त बैंक तथा वित्तीय संस्थासँग मर्जर अथवा एक्विजिसन गर्न तथा बैदेशिक रणनीतिक साझेदारीमा जान उपयुक्त बैंक देखिएमा सो सम्बन्धि सम्पूर्ण कार्य गर्न सञ्चालक समितिलाई अख्तियारी दिने, सर्वसाधारण शेयरधनीहरुको तर्फबाट सञ्चालक समितिमा प्रतिनिधित्व गर्ने ३ जना सञ्चालकको नियुक्त गर्ने प्रस्ताव बारे पनि छलफल हुने छ ।
बैंकको साधाराण सभा कात्तिक ६ गते, होटल पोखरा ग्राण्ड, पार्दि, पोखरामा बिहान ११ बजे शुरु हुनेछ।
वि.सं.२०७७ असोज १५ बिहीवार ०८:२९ मा प्रकाशित
