काठमाडौं । जनरल इन्स्योरेन्स कम्पनी लिमिटेडले आउँदो मंगलबार प्राथमिक सेयर (आईपीओ) बाँडफाँट गर्ने भएको छ ।
आईपीओ निष्कासन तथा बिक्री प्रबन्धक एनआईबीएल एस क्यापिटल लिमिटेडले आइतबार प्रिअलटमेन्ट गरेर मंगलबारभित्र आईपीओ बाँडफाँट गर्ने तयारी भएको जानकारी दिएको छ ।
कम्पनीले असोज ११ गतेदेखि १४ गतेसम्म ३० करोड रुपैयाँ बराबरको ३० लाख कित्ता आईपीओ निष्कासन गरेको थियो। सर्वसाधारणले बाँकी २७ लाख ३० हजार कित्ता सेयरका लागि आवेदन दिएका थिए ।
आईपीओमा ८ गुणा बढी आवेदन परेको छ। असोज १४ गते अन्तिम दिनसम्ममा ८ लाख १३ हजार ७२५ आवेदकबाट २ करोड २४ लाख ७७ हजार ३० कित्ताको लागि आवेदन परेको एनआईबीएलले जानकारी दिएको छ ।
न्यूनतम १० कित्ताको दरले आईपीओ वितरण गर्दा २ लाख ७३ हजार जनाले मात्रै पाउने देखिएको छ । कम्पनीको चुक्तापुँजी ७० करोड रुपैयाँ छ। आइपीओ बाँडफाँडपछि कम्पनीको चुक्तापुँजी बढेर १ अर्ब रुपैयाँ पुग्नेछ ।
वि.सं.२०७७ असोज १८ आइतवार १३:४९ मा प्रकाशित
