काठमाडौं । ज्योति लाइफ इन्स्योरेन्स कम्पनीले ६६ लाख कित्ता आईपीओ निष्कासन गर्ने तयारी शुरु गरेको छ ।
कम्पनीले आईपीओ निष्कासन गर्नको लागि नियामक निकाय नेपाल धितोपत्र बोर्डमा मंसिर १९ गते निवेदन दिएको छ । कम्पनीले आईपीओ निष्कासन गर्नको लागि विक्री प्रबन्धकमा एनएमबि क्यापिटल लिमिटेडलाई नियुक्त गरेको छ । बोर्डबाट स्वीकृती पाएपछि कम्पनीले आईपीओ निष्कासन गर्नेछ ।
हाल कम्पनीको चुक्तापूँजी रू. १ अर्ब ५४ करोड रहेको छ । ६६ लाख कित्ता आईपीओ निष्कासन गरी बाँडफाँट गरेपछि पूँजी रू. २ अर्ब २० करोड पुग्नेछ । कम्पनीले चालू आवको पहिलो त्रैमासमा गत आवको तुलनामा ९१ प्रतिशत नाफा वृद्धि गरेको छ ।
कम्पनीले गत आवको पहिलो त्रैमासमा रू. ३ करोड ७६ लाख ४१ हजार नाफा कमाएकोमा चालू आवको सोही अवधिमा वृद्धि भएर रू. ७ करोड २२ लाख २२ हजार पुगेको छ ।
चालू आवको पहिलो त्रैमासमा कम्पनीले जगेडा कोषमा रू. ४६ करोड ५ लाख छुट्याएको छ भने जीवन बीमा कोषमा रू.२ अर्ब २५ करोडभन्दा बढी जम्मा गरेको छ । गत आवको पहिलो त्रैमासको तुलनामा चालू आवको सोही अवधिमा कम्पनीको बीमाशुल्क पुरयाएका आर्जन ९७ प्रतिशत वृद्धि भएको छ ।
कम्पनीले गत आवको पहिलो त्रैमासमा रू. २७ करोड ६५ लाखभन्दा बढी बीमाशुल्क आर्जन गरेकोमा चालू आवको सोही अवधिमा वृद्धि भएर रू.५४ करोड ५७ लाखभन्दा बढी गरेको छ ।
कम्पनीको प्रतिशेयर आम्दानी रू. १८ दशमलव ७६ र प्रतिशेयर नेटवर्थ रू. १३३ दशमलव २३ रहेको छ ।
वि.सं.२०७७ मंसिर २४ बुधवार १४:५१ मा प्रकाशित