मकवानपुर । बागमती प्रदेशका मुख्यमन्त्री डोरमणि पौडेलले संघीय र प्रदेश सरकार कमजोर अवस्थामा नरहेको दाबी गर्नुभएको छ ।
बिहीबार हेटौंडामा आयोजित कार्यक्रमलाई सम्बोधन गर्ने क्रममा संघीय र प्रदेश सरकार कमजोर अवस्थामा रहेको भन्ने हल्लामा कुनै सत्यता नभएको दाबी गर्नुभएको हो ।
‘संघ र प्रदेशमा करिब दुई तिहाईको हाराहारी जनमतसहितको नेकपाको सरकार गठन भएको छ । यस्तो अवस्थामा सरकार कमजोर छ । छिट्टै ढल्छ भनेर देशमा अस्थिरता सिर्जना गर्न खोजिएको छ । तर, त्यो गलत हो’, मुख्यमन्त्री पौडेलले भन्नुभयो ।
उहाँले तीन तहको सरकारबीच समन्वयको अभावका कारण सोचे अनुसारको कामले गति नलिएको बताउनुभयो । ‘तीन तहको सरकार तीनतिर फर्किएको छ । जसले गर्दा काम गर्न समस्या भइरहेको छ ।’, पौडेलले तीनै तहको सरकारबीच समन्वय नभएसम्म जनअपेक्षा अनुसार विकासे काममा फड्को मार्न नसक्ने बताउनुभयो ।
वि.सं.२०७७ मंसिर २५ बिहीवार १७:१४ मा प्रकाशित