एजेन्सी । इसाइहरुको महान चाड क्रिसमस र नयाँ वर्ष नजिकिँदै जाँदा कोरोना संक्रमणको दर पुनः बढ्न थालेपछि फ्रान्सले दोस्रो चरणको लकडाउनका क्रममा रात्रिकालीन कर्फ्यूसमेतको निर्णय गरेको छ ।
जर्मनीमा कडा प्रकारको लकडाउन बुधबारदेखि लागू गरिनेछ । राती ८ बजेदेखि बिहान ६ बजेसम्म आवश्यकबाहेकका नागरिकलाई घरबाट बाहिर निस्कन अनुमति दिइएको छैन ।
क्रिसमसको पूर्वसन्ध्यामा यो नियममा केहि छुट हुनेछ तर नयाँ वर्षको पूर्वसन्ध्यामा लागू हुने छैन । बार र रेस्टुरेन्टहरु कम्तिमा २० जनवरीसम्म बन्द रहनेछन् ।
फ्रान्समा कोरोना भाइरसबाट मृत्यु हुनेहरुको संख्या मंगलबार ७ सय ९० थपिएर जम्मा ५९ हजार ७२ पुगेका छन् । फ्रान्सका नागरिकले दिउँसोको समयमा घरबाट निस्कन आवश्यक कागजपत्र देखाउनु नपर्ने भएको छ ।
तर दैनिक ५ हजार संक्रमण हुनु र त्यसको दर दिनदिनै दुईगुणा बढ्नुले रातीको समयमा कर्फ्यू लगाउने र सडकमा प्रहरी चेकिङ/निगरानी बढाउने निर्णय फ्रान्स सरकारको छ । संक्रमण दर अहिलेसम्मकै धेरै हुने क्रममा रहेको छिमेकी देश जर्मनीमा बुधबारदेखि निकै नै कडा खालको लकडाउन सुरु हुँदैछ ।
अत्यावश्यकबाहेकका पसलहरु देशभर बन्द हुँदैछन्, बालबालिकाको हेरचाह बिद्यालय वा घरमा जहाँ भए पनि एकै ठाउँमा गनुपर्नेछ । जर्मनीमा नोभेम्बरदेखि नै रेस्टुरेन्ट र बारहरु बन्द छन् ।
जर्मन चान्सलर एन्जेला मर्केलले क्रिसमसको किनमेलका लागि बजारमा देखिएको भीडले सामाजिक दूरी कायम गर्न नसकेको आरोप लगाएकी छन् ।
नयाँ लकडाउन डिसेम्बर १६ देखि जनवरी १० सम्म चल्नेछ । तर २४ देखि २६ डिसेम्बरसम्म आरामको समय छ, यो समयमा एक परिवारमा अन्य घरबाट बढीमा ४ जना सदस्यलाई आमन्त्रित गर्न सकिनेछ ।
वि.सं.२०७७ पुस २ बिहीवार १३:५८ मा प्रकाशित
