काठमाडौं । प्रभु बैंकको १९औं वार्षिक साधारण पुस २६ गते हुने भएको छ । कम्पनीले केन्द्रिय कार्यालय, बबरमहल, काठमाडौंमा बिहान ११ बजे सभा बोलाएको हो ।
सभाको प्रस्तावमा चुक्तापूँजीको १० प्रतिशतले हुन आउने रकम रू. १ अर्ब ३ करोड १५ लाख ५० हजार ६६४ बराबरको बोनस शेयर कर प्रयोजनका लागि शून्य दशमलव ५२६३ प्रतिशत नगद लाभांश वितरण गर्ने रहेको छ ।
कोभिड-१९ को जोखिमका कारण सरकारले तोकेको सीमाभित्र मात्र शेयरधनीहरु सभामा प्रवेश गर्न सक्ने भएका कारण अन्य शेयरधनीहरुको उपस्थितिका लागि भर्चुअल माध्यमबाट पनि उपस्थित हुन सक्ने व्यवस्था गरिएको बैंकले जानकारी दिएको छ ।
सभाको अन्य प्रस्तावमा ऋणपत्र जारी गर्ने प्रस्ताव उपर छलफल गरी पारित गर्ने, संस्थापक समूहबाट ३ जना र सर्वसाधारण समूहबाट ३ जना गरी ६ जना सञ्चालकहरुको निर्वाचन गर्ने र अन्य बैंक तथा वित्तीय संस्थाहरुसँग मर्जर तथा एक्विजिशन सम्बन्धि कार्य गर्न सञ्चालक समितिलाई अख्तियारी दिने रहेको छ ।
साधारण सभा प्रयोजनका लागि कम्पनीले पुस १० गतेदेखि साधारण सभा सम्पन्न नभएसम्मका लागि बुकक्लोज गर्ने भएको छ । बुक क्लोजका आधारमा पुस ९ गतेसम्मका कायम शेयरधनीहरुले सभामा सहभागिता जनाउन तथा लाभांश प्राप्त गर्न सक्नेछन्।
वि.सं.२०७७ पुस ३ शुक्रवार ११:२५ मा प्रकाशित
