काठमाडौं । इक्रा नेपाल लिमिटेडले नेपाल इन्फ्रास्ट्रचर बैंक लिमिटेडलाई इक्राएनपी बीबीबी रेटिङ्ग प्रदान गरेको छ ।
उक्त रेटिङ्ग प्राप्त गर्ने निकायहरु समयमा वित्तीय दायित्वपूरा गर्ने सम्बन्धमा मध्यम मात्रामा सुरक्षित मानिने इक्रा नेपालले बताएको छ । यस्ता निकायहरुमा मध्यम क्रेडिट जोखिम रहेको हुन्छ ।
उक्त रेटिङ्ग निष्कासनकर्ताको सामान्य क्रेडिट विश्वसनीयता सम्बन्धी राय मात्र भएको र यो कुनै खास ऋणपत्र बिशेषको राय भने नभएको कम्पनीले बताएको छ । उक्त कम्पनीले गत पुस १० गतेमात्र सर्वसाधारणलाई आईपीओ विक्री गर्न नेपाल धितोपत्र बोर्डबाट अनुमति पाएको छ ।
कम्पनीले रू.८ अर्ब बराबरको ८ करोड कित्ता आईपीओ विक्री गर्न अनुमति पाएको हो । हाल उक्त कम्पनीको चुक्तापूँजी रू. १२ अर्ब रहेको छ । आईपीओ पश्चात यो पूँजी रू. २० अर्ब पुग्नेछ ।
कम्पनीको अधिकत पूँजी रू. ४० अर्ब र जारी पूँजी रू. २० अर्ब रहेको छ । कम्पनीले हालसम्मकै ठूलो कित्ता आईपीओ विक्री गर्ने तयारी गरेको छ ।
कम्पनीको आईपीओ विक्री प्रबन्धकको जिम्मेवारी भने एनआईबिएल एस क्यापिटल लिमिटेडले पुरा गर्नेछ । उक्त कम्पनीको आईपीओ प्रत्याभूतिकर्ताको जिम्वेवारी भने नागरिक लगानीकोषले पाएको छ ।
वि.सं.२०७७ पुस १६ बिहीवार ११:२४ मा प्रकाशित
