कञ्चनपुर । कञ्चनपुरमा निर्माणाधीन चार लेन महाकाली पुल र सडकलाई भारत आफ्नो राष्ट्रिय राजमार्गसँग जोड्न सहमत भएको खबरले जिल्लावासी हर्षित भएका छन् ।
नेपाल सरकारका परराष्ट्र मन्त्री प्रदीप ज्ञवालीले भारत भ्रमणका क्रममा दुई देशबीच भएका सहमतिबारे जानकारी दिने क्रममा महाकाली पुल र सडकलाई राष्ट्रिय राजमार्गसँग जोड्न सहमत भएको खबर सुनेर आफूहरू ज्यादै खुसी भएको भीमदत्त नगरपालिका–१२ का टेकबहादुर कठायतले बताउनु भएको छ ।
यसले नेपालको सुदूरपश्चिम क्षेत्र र भारतको उत्तराखण्ड क्षेत्रको सडक सञ्जाल मजबुत हुनेमा स्थानीयहरू विश्वस्त रहेका छन् । कञ्चनपुरको महाकाली नदीमा २०७४ सालदेखि चार लेनको पक्की पुल निर्माण भइरहेको छ ।
तीन अर्ब २७ करोडको लागतमा निर्माण भइरहेको पुलको ६५ प्रतिशत भौतिक प्रगति भइसकेको छ । निर्माणको काम अहिले पनि जारी रहेको छ ।
वि.सं.२०७७ माघ ४ आइतवार १५:५३ मा प्रकाशित
