काठमाडौं । प्राइम कमर्सियल बैंकले चालू आवको दोस्रो त्रैमासिक वित्तीय विवरण बिहीवार सार्वजनिक गरेको छ । उक्त वित्तीय विवरण अनुसार कम्पनीको नाफा गत आवको दोस्रो त्रैमासको तुलनामा चालू आवको सोही अवधिमा ३९ प्रतिशतले वृद्धि भएको हो ।
कम्पनीले चालू आवको दोस्रो त्रैमासमा रू. १ अर्ब ८१ करोड ३३ लाख २९ हजार नाफा कमाएको छ । यो नाफा गत आवको सोही अवधिमा रू. १ अर्ब ३० करोड ७ लाख थियो । चालू आवको दोस्रो त्रैमासमा कम्पनीको खुद ब्याज आम्दानी र सञ्चालन नाफामा वृद्धि भएकाले नाफा बढेको हो ।
चुक्तापूँजी रू. १६ अर्ब ८ करोड ३० लाख रहेको कम्पनीले जगेडा कोषमा रू. ४ अर्ब ९४ करोड ७६ लाख र रिटेन्ड अर्निङमा रू. १ अर्ब ३७ करोड ८२ लाख सञ्चित गरेको छ । चालू आवको दोस्रो त्रैमासमा कम्पनीको वितरणयोग्य नाफा रू. १ अर्ब २६ करोड ४२ लाख रहेको छ ।
सो अवधिमा प्रतिशेयर आम्दानी रू. २२ दशमलव ५५, मूल्य आम्दानी अनुपात १२ दशमलव ६०, तरलता अनुपात २३ दशमलव ८४ प्रतिशत र प्रतिशेयर नेटवर्थ रू. १३९ दशमलव ३३ रहेको छ ।
वि.सं.२०७७ माघ १५ बिहीवार १३:२५ मा प्रकाशित
