पराजन के.सी.
काठमाडौं । अर्थमन्त्री विष्णुप्रसाद पौडेले बजेटका आकारमा संशोधन गर्नुभएको छ । सरकारले चालु आर्थिक वर्षमा १४ खर्ब ७४ अर्ब रुपैयाँ खर्च हुने अनुमान गरेपनि मन्त्री पौडेलले त्यसलाई संशोधन गरेर १३ खर्ब ४४ अर्ब ६८ करोड रुपैयाँ मात्रैहुने जानकारी गराउनु भएको छ ।
अर्थ मन्त्रालयमा आयोजित चालु आवको बजेटको अर्धबार्षिक समिक्षा गर्दै मन्त्री पौडेलले खर्चको आकार घटाउनु भएको हो । मन्त्रीका अनुसार खर्च हुने संशोधित अनुमान कुल विनियोजनको करिब ९१.१९ प्रतिशत हो ।
यस्तै चालुतर्फ ९ खर्ब १४ अर्ब ७८ करोड रुपैयाँ खर्च हुने भनिएको छ । यो भनेको विनियोजित बजेटेका ९६.४० प्रतिशत हो । यस्तै पुँजीगततर्फ २ खर्ब ८३ अर्ब ४ करोड रुपैयाँ खर्च हुने अनुमान रहेको छ । यो भनेको विनियोजनको ८०.२० प्रतिशत हो भने वित्तीय व्यवस्थातर्फ १ खर्ब ४६ अर्ब ८६ करोड रुपैयाँ खर्च गर्ने भनिएको छ । यो भनेको विनियोजनको ८५ प्रतिशत हो । यो वर्ष सरकारले यो भन्दा बढी खर्च गर्न सक्ने सम्भावन नरहेको उहाँको भनाइ छ ।
सरकारले खर्च मात्रै नभएर राजस्वको लक्ष्यमा पनि संशोधन गरेको छ । राजस्व र आन्तरिक ऋण सहित १० खर्ब ७४ अर्ब ६८ करोड, वैदेशिक अनुदानतर्फ ३५ अर्ब र वैदेशिक ऋणतर्फ २ खर्ब ३५ अर्ब खर्च हुने संशोधित अनुमान रहेको छ ।– प्रशिक्षार्थी पत्रकार
वि.सं.२०७७ माघ २७ मंगलवार १६:२३ मा प्रकाशित
