काठमाडौं । बीमा समितिले नयाँ पुर्नबीमा कम्पनीलाई लाईसेन्स दिने वा नदिने भन्ने विषयमा अध्ययन गर्न तीन सदस्यीय अध्ययन समिति गठन गरेको छ ।
समितिका अनुसार बीमा विज्ञ भोजराज शर्माका संयोजकत्वमा तीन सदस्यीय अध्ययन समिति गठन भएको छ । आइतबार गठन भएको समितिको सदस्यमा बीमक संघका अध्यक्ष दिप प्रकाश पाण्डे र चाटर्ड एकाउन्टेन सुजन आचार्य रहनु भएको छ ।
समितिले काम भने बुधबारबाट सुरु गर्ने बताइएको छ । समितिलाई १५ दिन भित्र अध्ययन गरेर प्रतिवेदन बुझाउने समय रहेको छ । त्यो अवधिसम्ममा आवश्यक सबै सूचना संकलन गर्न सकेको खण्डमा मात्रै त्यो अवधिमा प्रतिवेदन बुझाइने छ ।
बीमा क्षेत्रमा अन्नपूर्ण रि–इन्स्योरेन्स आउने चर्चा चलिरहेको समयमा समिति ठगन भएको छ । त्यो समितिले दिएको प्रतिवेदनमा नयाँ पुनर्बीमा आवश्यक नभएको ठानिएमा नयाँ कम्पनी आउने सम्भावना न्यून हुने देखिएको छ । अन्यथा समय थप गरेर भएपनि अध्ययन गरिने बताइएको छ ।
अहिले जीवन तथा निर्जीबन बीमा कम्पनी बढी भएको ठहर गरेको बीमा समितिले पुनर्बीमा को लागि नयाँ कम्पनी आवश्यक ठान्ने हो वा नठान्ने हो त्यो धेरैलाई चासोको विषय बनेको छ ।
समितिले अहिले बजारको स्थीति, भविश्यको सम्भावना, अहिले भएको कम्पनीले गरेको कामको प्रगति लगायतका विषयलाई अध्ययन गरेर नयाँ कम्पनी आवश्यक छ वा छैन भनेर प्रतिवेदन बन्ने एक सदस्यले बताउनु भयो ।
वि.सं.२०७७ फागुन १८ मंगलवार १३:१८ मा प्रकाशित
