काठमाडौं । नयाँ आर्थिक वर्षको पहिलो सेयर बजारमा लगानीकर्ता निकै उत्साहित देखिएका छन् ।
कारोबारको सुरु देखि नै बजार तिब्र बढोत्तरीको गतिमा अघि बढेको थियो । नयाँ आर्थिक वर्षको पहिलो कारोबार निकै भव्य बनेको छ ।
लगानीकर्ताहरु नयाँ जोश र उर्जाको साथ बजारमा प्रवेश गरेसँगै बजारले निकै पृथक गति लिएको छ ।
धितोपत्र बोर्डले ५१ वटा कम्पनीको नाम सार्वजनिक गरेपछि प्यानिक बनेको बजार पुन पुरानै गतिमा अघि बढ्ने लक्षण नयाँ आर्थिक वर्षको पहिलो कारोबारले संकेत गरेको छ ।
यो दिन नेप्से मापन गर्ने सूचक मात्रै नभएर कारोबार रकमले पनि लगानीकर्तालाई केही हदसम्म उर्जा दिएको छ । हुनत् यसअघि कारोबार रकम करिब २० अर्ब पुँगी सकेको छ । बोर्डको एक सूचनाले इन्डेक्ससँगै कारोबार रकम पनि निकै घटेको थियो ।
नयाँ आवको पहिलो कारोबारले लगानीकर्ताको मनोबल बढाउने तर्फ संकेत गरेको छ । आजै देखि लगानीकर्ताले दुईथरी लाभकर तिर्ने व्यवस्था सुरु भएको छ ।
३६५ दिनभन्दा कम अवधिमा सेयर बिक्री गरेमा ७.५ र ३६५ दिन भन्दा अढी अवधिको सेयर बिक्रीमा ५ प्रतिशत लाभकर तिर्ने व्यवस्था सुरु भएको छ । लाभकरमा नयाँ व्यवस्था लागुभएपनि बजारमा त्यसले खासै असर नपरेको कारोकार गतिविधिले देखाएको छ । लगानीकर्ता अझै पनि मौद्रिक नीतिको प्रतिक्षामा रहेका छन् ।
नयाँ अर्थमन्त्री जनार्दन शर्माले बजार र साना लगानीकर्ताको हितमा काम गर्ने भनेपछि बजारमा थप हौसल ा थपिएको पनि बजारका जानकारहरुको भनाई छ ।
यो दिन बजार ९७.२१ अंकले बढेर परिसूचक २९८०.७१ बिन्दुमा रोकिएको छ । २२१ कम्पनीको २ करोड ८८ लाख ६३ हजार कित्ता सेयर ११ अर्ब ६३ करोड ८१ लाख २६ हजार रुपैयाँको सेयर किनबेच भएको छ । कारोबारमा सबै समूहको उपसूचकमा निकै सुधार देखिएको छ ।
वि.सं.२०७८ साउन ३ आइतवार १५:०२ मा प्रकाशित