काठमाडौं । प्रभु बैंकले आजदेखि संस्थापक सेयर बिक्री गर्ने भएको छ । बैंककले संस्थापक समूह तर्फको २ लाख ५२ हजार ७२८ कित्ता सेयर बिक्री गर्न लागेको हो ।
उक्त सेयरको न्युनतम मूल्य प्रतिकित्ता २१० रुपैयाँ तोकिएको छ । उक्त सेयर खरिद गर्न इच्छुक बैंकको संस्थापक सेयरधनीहरु वा योग्य जो कोही व्यक्ति, कम्पनी, संघसंस्थाहरुले आवेदन दिन सक्नेछन् ।
सेयर खरिदका लागि तोकिएको न्युनतम मूल्य भन्दा बढी अंकित गरि भदौ २८ गतेभित्र आवेदन पेश गर्नुपर्ने बैंकले जनाएको छ ।
उक्त सेयर खरिदका लागि न्युनतम १ हजार कित्ताका लागि आवेदन दिनुपर्नेछ ।
उक्त सेयर भन्दा बढी खरिद गर्नका लागि बोलपत्र पेश गर्ने बोलपत्रदाताले १० अंकको गुणाङ्कमा अधिकतम सम्पूर्ण कित्ताको लागि आवेदन दिन सकिने बैंकले जनाएको छ ।
बिक्री प्रबन्धकमा मुक्तिनाथ क्यापिटल लिमिटेड रहेको छ ।
वि.सं.२०७८ भदौ १५ मंगलवार १०:२३ मा प्रकाशित
