नीजि मोटरसाइकलमा सरकारी नम्बर प्लेट राखेर पेट्रोल भर्न लाइनमा बसेका एक जनालाई पूल्चोक प्रहरीले पक्राउ गरेको छ । रामेछाप चिसापानी घर भइ काठमाडौंको सिनामंगलमा रेष्टुरेन्ट संचालन गर्दै आएका राजु श्रेष्ठलाई पूल्चोक प्रहरीले पक्राउ गरेको हो ।
उनले आफ्नो बा ६६ प ६२४२ नम्बरको मोटरसाइकलमा बा ३ प ६२४२ नम्बरको नम्बर प्लेट राखेका थिए । सरकारी निकायमा बा २ का मोटरसाइकल मात्र संचालनमा छन् । बा ३ नपुगेकाले मोटरसाइकलको ब्लु बुक हेर्दा उनले सरकारी नम्बर प्लेट राखेको फेला परेको प्रहरी निरीक्षक हर्क विश्वले जानकारी दिए ।
उनले बिहानैदेखि साझा पेट्रोल पम्पमा तेल भर्न आएका सरकारी नम्बरप्लेट भएका मोटरसाइकल जाँच गरेका थिए ।
पूल्चोक प्रहरीले मोटरसाइकल र श्रेष्ठलाई ललितपुर प्रहरीमा बुझाएको छ । श्रेष्ठले पेट्रोल भर्न आफूले सास्ती पाएको र चलाखीपूर्ण काम गर्दा प्रहरीले समातेको बताएका छन् । पेट्रोल पम्पहरुले निजी सवारी सानलाई तेल भर्न रोक लगाएका छन् ।
वि.सं.२०७२ असोज १५ शुक्रवार १२:०२ मा प्रकाशित
