काठमाडौं । नेपाल भित्रिने सवारी साधनको भन्सार २० प्रतिशत कम गर्न व्यवसायीले सुझाव दिएका छन् । अर्थमन्त्री विष्णु पौडेललाई भेटी व्यवसायीले यस्तो सुझाव दिएका हुन् ।
सवारी साधनको किसिम हेरिकन सरकारले २४५ प्रतिशतसम्म भन्सार उठाइरहेको छ । सरकारले सवारीलाई विलासी वस्तुको सूचीमा राखेको छ । तर, व्यवसायीहरु सवारी अत्यावश्यक साधन भइसकेको बताउँदै भन्सार घटाउन सरकारसँग माग गरिरहेका छन् ।
सरकारले सबैभन्दा बढी भन्सार राजश्व पनि सवारी साधनबाट उठाउँदै आएको छ । सवारी साधनलाई सरकारले राजश्व उठाउने बस्तुका रुपमा मात्र हेरेको भन्दै व्यवसायीहरु असन्तुष्ट छन् । सडक विस्तार गरेपछि सवारी साधन थप्नुपर्ने आवश्यकता रहेको औंल्याउँदै उनीहरुले भन्सार घटाएर सवारी कम आयस्रोत हुनेको पनि पहुँचमा पुर्याउनुपर्ने माग गरेका छन् ।
व्यवसायीले मोटर पार्टसको भन्सार पनि घटाउन माग गरेको छ । उनीहरुले पार्टपुर्जाको भन्सार घटाएर ५ प्रतिशत कायम गर्न सुझाव दिएका छन् । त्यस्तै, साइकलको भन्सार पनि घटाएर १ प्रतिशत कायम गर्न सुझाव छ ।
प्रकाशितः २०७३ जेठ २
वि.सं.२०७३ जेठ २ आइतवार १६:४२ मा प्रकाशित
