नवलपरासी । गिद्धका लागि जंगल तथा खुला प्रकृति संरक्षण भनेको सामान्य नै मानिन्छ । तर नेपालमै एउटा यस्तो ठाउँ छ, जहाँ गिद्धको लागि रेष्टुराँ नै खोलिएको छ । सुन्दा अचम्म लाग्छ तर पर्यटन प्रवद्र्धन साथै गिद्ध संरक्षणका लागि नवलपरासी (बर्दघाट– सुस्ता पूर्व) जिल्लामा अनौठो अभियान चलाइएको छ ।
पछिल्लो समय गिद्धको संख्या घट्दै जान थालेपछी संरक्षण अभियान अन्तर्गत कावासोती नगरपालिका–८ मा गिद्धलाई आहार जुटाउनका लागि जटायु रेष्टुराँ नाम नै राखी गिद्ध संरक्षण गरिँदै आएको छ ।
युएनडिपीको स्मल ग्रान्ट्स प्रोग्राम (एसजिपी)ले आर्थिक सहयोग गरेपछि यसरी गिद्धको संरक्षण शुरु भएको जटायु रेष्टुराँ व्यवस्थापन समितिका अध्यक्ष दानबहादुर चौधरी बताए ।
बूढा गाईगोरुलाई गिद्धको आहारा बनाई रेष्टुराँ नै बनाइएको छ । चौधरीका अनुसार गिद्ध संरक्षण गर्नका लागि चितवनको कसरामा रहेको प्रजनन केन्द्रबाट गिद्धलाई नवलपुरको प्रकृतिमा छाडेर वातावरणअनुसारको स्थानमा संरक्षण गरिएको छ ।
शुरुमा ७२ गिद्ध रहेको सो स्थानमा हाल एसजिपीको सहयोगमा गाउँले संरक्षणमा लागेपछि २१७ सम्म गिद्ध गणना गरिएको चौधरीले जानकारी दिनुभयो हाल त्यहाँ पर्यटकको आवागमन पनि बढेको छ ।
पर्यटकले गिद्धको अध्ययन गर्नाका साथै जिप सफारी गरेर घाँसे मैदान, गैँडा, हात्ती, बाघलगायत जंगली जनावर हेरेर रमाउने गर्छन् । गिद्धको अध्ययन गर्नकै लागि भनेर जीवशास्त्रका विदेशी विद्यार्थी पनि यहाँ आउने गरेका छन् ।
२०७४ फागुन २९ गते प्रकाशित ।
वि.सं.२०७४ फागुन २९ मंगलवार ०८:२९ मा प्रकाशित