काठमाडौं । रैराङ हाइड्रोपावर डेभलपमेन्ट कम्पनीको आइपीओ बुधबार बाँडफाँड भएको छ । कम्पनीको सेयर विक्री प्रबन्धक एनआईबिएल एस क्यापिटलको कार्यालय लाजिम्पाटमा बाँडफाँड गरिएको हो । हाइड्रोको सेयर गोलाप्रथाबाट ७६ हजार ४४० जना आवेदकले १० कित्ताका दरले प्राप्त गरेका छन् ।
रैराङको साधारण सेयरमा कुल एक लाख ७५ हजार ४७२ वटा आवेदन परेकोमा १९४ वटा आवेदन रद्द भएको कम्पनीको सेयर निष्काशन तथा बिक्री प्रबन्धक एनआईबिएल एस क्यापिटलले जनाएको छ । कम्पनीको सेयर १७.७८ गुणाले अधिक माग भएको थियो ।
रैराङले वैशाख ३१ गतेदेखि जेठ ३ गतेसम्म कुल ८ लाख ४० हजार कित्ता आइपीओमध्ये ३३ हजार ६०० कित्ता कम्पनीका कर्मचारी र ४२ हजार कित्ता म्युचुअल फन्डलाई छुट्याएर बाँकी रहेको ७ लाख ६४ हजार ४०० कित्ता मात्र सेयर सर्वसाधारणलाई बिक्री गरेको हो ।
कम्पनीले जारी पुँजी ५६ करोड रुपैयाँको १५ प्रतिशत सेयर निष्कासन गरेको हो । रैराङले यसअघि पाँचथर र ताप्लेजुङ जिल्लाका आयोजना प्रभावित स्थानीयबासीलाई ५ लाख ६० हजार कित्ता आइपीओ बिक्री गरिसकेको छ ।
२०७५ जेठ ९ गते प्रकाशित
वि.सं.२०७५ जेठ ९ बुधवार १०:१९ मा प्रकाशित
