काठमाडौं । अनलाइनबाटै सेयर कारोबार हुन थालेपछि सेयर बजारमा सुधार देखिएको छ । निरन्तर ओरालो लाग्दै आएको सेयर बजार मापक नेप्से मंगलबार करिव १४ अंकले बढन पुगेको छ ।
आइतबार र सोमबार दोहोरो अंकले घटेर नेप्से १२ सय अंक भन्दा तल आइपुगेको थियो । तर, मंगलबार १३.९७ बिन्दुले नेप्से बढेपछि १२०७.३१ बिन्दुमा पुगेको छ ।
कात्तिक २० गतेदेखि नेपाल स्टक एक्चेन्ज (नेप्से) ले आधुनिक प्रविधि अनलाइनबाट सेयर कारोबार गर्ने औपचारिक घोषणा गरेपनि त्यसको प्रभावकारी कार्यान्वय हुन नसकेपछि सेयर बजारमा खासै सेयर किनबेच हुन सकेको थिएनन् । अनलाइनबाट सेयर कारोबार गर्न ब्रोकरहरु अलमलमा पर्दा कारोबारमा समेत प्रभावित हुन पुगेको थियो ।
तिहारपछि पहिलो दिन आइतबार र दोस्रो दिन सोमबार खुलेको सेयर बजारमा अनलाइनबाट सेयर कारोबार गर्न ब्रोकर त अलमलमै परेका थिएन नै । त्यससँगै लगानीकर्ता पनि अलमलमा परेका थिए । तर, तिहारपछिको तेस्रो कारोबार दिन मंगलबार भने सेयर बजारमा चमक देखिन पुगेको थियो ।
बैंक तथा वित्तीय संस्थाहरुले धमाधम नगद लाभांश वितरण गर्न थालेकाले पनि सेयर बजार उकालो लाग्न गएको कतिपयको बुझाइ छ । वाणिज्य बैंकहरुले पनि एकपछि अर्को गर्दै लाभांश घोषणा गर्न थालेका छन् । एभरेष्ट बैंकले २० प्रतिशत नगद लाभांश, स्टयाण्डर्ड चार्टर्ड बैंकले १७.५० प्रतिशत नगद लाभांश र सानिमा बैंकले १४ प्रतिशत नगद लाभांश वितरण गर्ने प्रस्ताव गरिसकेका छन् । उक्त प्रस्ताव नेपाल राष्ट बैंकले स्वीकृत गरेपछि बैंकले साधारणसभाबाट पारित गराएर लगानीकर्तालाई लाभांश वितरण गर्ने गर्छन् ।
२०७५ कार्तिक २८ गते प्रकाशित
वि.सं.२०७५ कात्तिक २८ बुधवार १०:३१ मा प्रकाशित
