काठमाडौं । एनआइसी एसिया बैंकको २१.०५२ प्रतिशत लाभांश सुरक्षित गर्ने बिहीबार (भदौ २६ गते) अन्तिम दिन हो ।बैंकले साधारण सभा प्रयोजनका लागि भदौ २९ गते आइतबारदेखि असोज १० गतेसम्म बुक क्लोज गर्दैछ ।
त्यसैले भदौ २८ गतेसम्म कायम सेयरधनीले यो लाभांश पाउन सक्ने भए पनि यस दिन शनिबार परेको छ । २७ गते शुक्रबार पनि सेयर कारोबार नहुने भएकाले बिहीबारभित्र सेयरधनी बनिसक्नुपर्ने हुन्छ ।
बैंकले असोज १० गते वार्षिक साधारण सभा बोलाएको छ । सभामा बैंकले २१.०५२प्रतिशत लाभांश पारित गर्ने प्रस्ताव पेश गर्दैछ ।
बैंकले गत वर्षको नाफाबाट ११.०५२६ प्रतिशत नगद र १० प्रतिशत बोनस सेयर गरी कुल २१.०५२ प्रतिशत लाभांश दिन लागेको हो । सभा आर्मी अफिसर्स क्लब, भद्रकाली काठमाडौंमा बिहान ९ बजे सुरु हुनेछ ।
बैंक अन्य बैंक तथा वित्तीय संस्था एक्वायर गर्न पनि तयार देखिएको छ । कुनै वित्तीय संस्था गाभ्न परेमा त्यसको सम्पूर्ण जिम्मेवारी सञ्चालक समितिलाई दिने प्रस्ताव पनि पेश हुँदैछ ।
आर्थिक वर्ष २०७५/७६ को नाफा नोक्सान सम्बन्धी हिसाबकिताबका सम्बन्धमा पनि छलफल हुनेछ । यस्तै, आर्थिक वर्ष २०७६/७७ का लागि लेखापरीक्षक नियुक्ति र पारिश्रमिक निर्धारण गर्ने अर्को एजेन्डा पनि लगिनेछ । प्रबन्धपत्र तथा नियमावली संशोधनको एजेन्डा पनि छ ।
हाल बैंकको चुक्ता पुँजी ८ अर्ब ८३ करोड ४२ लाख २८ हजार रुपैयाँ छ । प्रस्तावित बोनस वितरणपछि पुँजी ९ अर्ब ७१ करोड ७६ लाख ५० हजार रुपैयाँ पुग्नेछ ।
गत आर्थिक वर्षमा एनआइसीले ३ अर्ब ५ करोड ५५ लाख रुपैयाँ खुद नाफा कमाएको छ । यसको प्रतिसेयर आम्दानी ३४ रुपैयाँ ५६ पैसा रहेको छ ।
२०७६ भदौ २६ गते प्रकाशित
वि.सं.२०७६ भदौ २६ बिहीवार १०:०८ मा प्रकाशित