काठमाण्डौं । यस पटकको एसएलसीमा ग्रेडिङ सिस्टमको शुभारम्भ भएसँगै विद्यार्थीहरुले ११ कक्षामा कुन विषय पढ्न पाउने वा नपाउने भन्ने अन्योल भएपछि शिक्षा मन्त्रालयले कक्षा ११ मा भर्ना हुने शैक्षिक योग्यताको आधार संशोधन गरेको छ ।
सरोकार बाला निकायहरुसँग हिजो बुधबार भएको छलफलबाट यस्तो संशोधन गरिएको मन्त्रालयले जनाएको छ । मन्त्रालयका अनुसार यस अघि सी ग्रेड ल्याउनेले पढ्न पाउने÷नपाउने भनेर तोकिएको विषयलाई संशोधन गरेर डी प्लस बनाइएकोछ ।
यो संशोधनसँगै यसअघि प्राविधिक संकाय पढ्न विज्ञान, गणित र अंग्रेजीमा सी ग्रेड ल्याएको हुनु पर्थ्यो । अब डी प्लस ग्रेड ल्याएकाले पनि सो विषयहरु पढ्न पाउनेछन् । तर, अरु विषय सामाजिक र नेपालीमा न्यूनतम डी प्लस ग्रेड ल्याउनु पर्ने पुरानो आधार कायमै छ । यसका साथै, विज्ञान संकायमा पढ्न तय गरिएको शैक्षिक योग्यताको आधार पनि पुरानै छ ।
१६ असार २०७३, ११।००
वि.सं.२०७३ असार १६ बिहीवार १३:४६ मा प्रकाशित