काठमाडौं । जलविद्युत् आयोजना प्रबद्र्धक हिमालयन ऊर्जा विकास कम्पनी लिमिटेडले आयोजना प्रभावित स्थानीय वासिन्दा र सर्वसाधारणलाई सेयर निश्कासन गर्ने भएको छ ।
कम्पनीको १६ औं वार्षिक साधारणसभाले २४ करोड ७५ लाख रुपैयाँ बराबरको २४ लाख ७५ हजार कित्ता सेयर सर्वसाधारण र आयोजना प्रभावित स्थानीय बासिन्दालाई निश्कासन गर्ने प्रस्ताव पारित गरेको छ । कम्पनीले एक महिनाभित्र बिक्री प्रवन्धक नियुक्त गरेर सेयर निश्कासनको काम अघि बढाउने प्रवन्धक प्रकाश दुलालले जानकारी दिए । उनका अनुसार यसमध्ये ९ करोड ९० लाख रुपैयाँ बराबरको ९ लाख ९० हजार कित्ता सेयर आयोजना प्रभावित स्थानीय बासिन्दालाई दिने भएको छ ।
यस्तै १४ करोड ७५ लाख रुपैयाँ बराबरको १४ लाख ७५ हजार कित्ता सेयर सर्वसाधारणलाई निश्कासन हुनेछ । कम्पनीले १२ मेगावाटको उपल्लो खिम्ती र ७ मेगावाटको माथिल्लो खिम्ती आयोजना निर्माण गरिरहेको छ । उपल्लो खिम्ती ०७५ सालको असार र माथिल्लो खिम्ती सोही वर्षको भदौसम्म सम्पन्न हुने दुलाले बताए । दुबै आयोजना बनाउन ३ अर्ब १५ करोड रुपैयाँ लाग्ने छ । आयोजनाको सिभिल निर्माणको काम तिब्र गतिमा अघि बढेको उनले जानकारी दिए । यस्तै आयोजनाको इलेक्ट्रोमेकानिकल लगायत अन्य काम पनि भइरहेको छ । आयोजना रामेछाप र दोलखा जिल्ला भएर बग्ने खिम्तीखोलामा छ ।
प्रकाशित मितिः २०७३ पुस ६ गते
वि.सं.२०७३ पुस ६ बुधवार १२:५६ मा प्रकाशित
