झापा । भारतसँग सीमा जोडिएका नाका आजदेखि ७२ घन्टाका लागि बन्द भएका छन् । स्थानीय तहको दोस्रो चरणको निर्वाचनलाई मध्यनजर गर्दै सीमा नाका बन्द भएको हो ।
काँकडभिट्टा, भद्रपुरसहितका नाका बन्द भएको छ । ७२ घन्टासम्म कुनै पनि देशका नागरिक आवतजावत गर्न नपाइने प्रमुख जिल्ला अधिकारी उत्तरकुमार खत्रीले बताए ।
स्थानीय तहको निर्वाचनलाई स्वतन्त्र, निष्पक्ष, भयरहित, शान्तिपूर्ण र मर्यादित रुपमा सम्पन्न गराउन सीमा नाका बन्द गरिएका हुन् । जिल्लाको पूर्वी र दक्षिण क्षेत्रअन्तर्गत ११८ किमी क्षेत्रफल भारतसँग सीमा जोडिएको छ ।
यसैबीच निर्वाचन अवधिभर मादक पदार्थको बिक्री वितरण तथा ओसारपसारमा समेत निषेध गरिएको छ । असार १४ गते मतदानका दिन जिल्ला प्रशासन कार्यालयबाट अनुमति लिएका बाहेक अन्य सवारीसाधन चलाउन नपाइने प्रहरी नायब उपरीक्षक हरिप्रसाद शर्माले बताए ।
प्रकाशित मितिः २०७४ असार १२
वि.सं.२०७४ असार १२ सोमवार ११:२६ मा प्रकाशित
