काठमाडौ। नेपाल वायुसेवा निगमले अमेरिकन कम्पनी एएआर कर्पोरेसनसँग दुईवटा वाइडवडी जहाज खरीद सम्झौता गरेको छ। निगमका तर्फबाट महाप्रवन्धक सुगतरत्न कंसाकार र एएआरका अन्तर्राष्ट्रिय सप्लार्इ चेन प्रेसिडेन्ट दीपक शर्माले जहाज खरीद सम्झौंतामा हस्ताक्षर गरेका छन्।
मन्त्रालय,निगम संचालक समिति र व्यवस्थापनको लामो छलफलपछि सम्झौंतापत्रको बुँदा तयार पारि शुक्रबार हस्ताक्षर भएको बताईएको छ । सम्झौता अनुसार एएआरले एयरवस कम्पनीको ए ३३०–२२० सिरिजका दुर्इवटा वाइडबडी जहाज निगमलार्इ दिनेछ। पहिलो विमान सन् २०१८ को अप्रिलसम्म आइसक्ने गरी सम्झौता भएको हो । सम्झौताअनुसार दोस्रो विमान सन् २०१८ को मेसम्ममा आइपुग्नेछ ।
अहिले नेपालले किन्न लागेको विमान अन्तरार्ष्ट्रिय बजार मूल्य भन्दा सस्तो परेको बताईन्छ ।दुबै विमान २ सय ९ दशमलव ६ मिलियन अमेरिकन डलर २१ अर्ब ९० करोड रूपैयाँमा खरिद गर्ने गरी सम्झौता भएको छ । पोर्चुगिज एभिएसन कम्पनी हाइफ्लाइले एयरवससँग खरीद अर्डर गरेपनि कम्पनी ऋणमा रहेको कारण जहाज किन्न नसक्ने भएपछि कर्पोरेसनले सकारेर निगमलाई बेच्न लागेको हो। कुल दुईसय ८० सिट क्षमताका दुइवटा जहाजमा १६ वटा विजनेस क्लास सीट हुनेछ।
१६ वटा विजनेस क्लास सीट राख्नका लागि स्वीकृति दिइसकेको र बाँकी दुईसय ६४ वटा सिट इकोनोमिक क्लासका हुने उनले बताए। वाइडबडी विमान ल्याएपछि निगमले काठमाडौंबाट लण्डन, सिंगापुर, सिड्नी लगायत चीनका बिभिन्न गन्तव्यमा सिधा उडान गर्ने लक्ष्य राखेको छ।
प्रकाशित मितिः २०७३ चैत २५
वि.सं.२०७३ चैत २५ शुक्रवार १७:४६ मा प्रकाशित
