मंगलबार सेयर बजार परिसूचक नेप्से ३४.७२ अंकले बढेर १६३७.३७ विन्दुमा आइपुगेको छ । नेप्से सूचकसँगै कारोबार रकममा पनि उल्लेख्य वृद्धि देखिएको छ ।
मंगलबार कुल १४८ कम्पनीको ९१ करोड ९३ लाख रुपैयाँभन्दा धेरैको सेयर किनबेच भएको छ । सेयर बजारमा ७, ८८६ सेयर कारोबारबाट कुल १५ लाख १६ हजार २०२ कित्ता सेयर किनबेच भएका छन् ।
मंगलबार उत्पादनमूलकबाहेक बाँकी सबै समूहका परिसूचक उकालो लागेका छन् । उत्पादनमूक समूहमा १४.०६ अंकले गिरावट आएको छ । यता, बिमा समूहको सूचकले मंगलबार छलाङ मारेको छ । बिमा सूचक १७२.५७ विन्दुले बढेको छ । यसैगरी, होटेल सूचक ६२.४५ अंकले माथि लागेको छ । पुँजी बजारमा अधिक हिस्सा ओगट्ने वाणिज्य बैंक समूहमा ३५.८२ अंकको वृद्धि देखिएको छ ।
मंगलबार कारोबार रकममा आधारमा सिभिल बैंकले बाजी मारेको छ । सिभिलको ७ करोड २६ लाख रुपैयाँभन्दा बढीको सेयर किनबेच भएको हो । कारोबार रकमका आधारमा दोस्रो र तेस्रो स्थानमा क्रमशः स्टान्डर्ड चार्टर्ड बैक र सिद्धार्थ इन्सुरेन्स परेका छन् ।
नयाँ सरकार गठन गर्न राजनीतिक दलहरुबीच सहमति भएपछि पुँजी बजार पनि हौसिएको देखिन्छ । राजनीतिक ध्रुवीकरण बढ्दा सुस्त भएको सेयर सूचक मंगलबार नेपाली काँग्रेसका सभापति शेरबहादुर देउवाको नेतृत्वमा नयाँ सरकार गठन गर्ने बाटो खुला हुँदा लगानीकर्ता हौसिएको बताईन्छ।
प्रकाशित मितिः २०७४ जेठ २३
वि.सं.२०७४ जेठ २३ मंगलवार १५:५१ मा प्रकाशित