काठमाडौं । आइसिसी वर्ल्ड क्रिकेट लिग च्याम्पियनसिपमा नेपाल र नामिबियाबिचको खेल आउँदो बैशाख ४ गते र ६ गते काठमाडौंमा हुने भएको छ ।
अन्तर्राष्ट्रिय क्रिकेट परिषद आइसिसीले सोमबार च्याम्पियनसिपको तेश्रो चरणको खेल हुने मिति र खेल स्थल सार्वजनिक गरेको हो ।
खेल त्रिभुवन विश्वविद्यालयको खेल मैदान कीर्तिपुरमा हुने छ ।
तर यसको पूर्वाधार र सुरक्षा व्यवस्थाको अनुगमन गरेर सन्तोषजनक पाइएमा मात्रा प्रतियोगिता कीर्तिमापुरमा सञ्चालन गर्ने सर्त आइसिसीले राखेको छ ।
आइसिसी वर्ल्ड क्रिकेट लिग च्याम्पियनसिपमा स्कटल्याण्ड र पपुवान्युगिनीसँग खेलेका सबै ४ खेल हारेको नेपाल कुनै अंक नजोडी अंक तालिकाको पुछारमा छ । अहिलेसम्म खेलेका ४ मध्ये एक खेल जितेका नामिबिया २ अंकसहित छैटौं स्थानमा छ ।
हङकङ, केन्या, नेदरल्याण्ड्स र स्कटल्याण्डको भने समान ४ खेलबाट समान ६ अंक छ । नेपालसँगका दुवै खेल जितेको पपुवान्युगिनीको ४ खेलबाट ४ अंक नै छ । प्रतियोगिताको अर्को टोली युएईको भने ४ खेलबाट २ अंक छ ।
वि.सं.२०७२ मंसिर २८ सोमवार १३:१२ मा प्रकाशित
