काठमाडौं । ऐतिहासिक धरहरा पुनर्निर्माण कार्य सबै नेपाली जनताबाटै आर्थिक संकलन गरेर पुरा गर्ने प्रधानमन्त्री केपी शर्मा ओलीले घोषणा गरेका छन् ।
आज धरहरामा आयोजित ऐतिहासिक धरोहर पुनर्निर्माण राष्ट्रिय संकल्पमा प्रधानमन्त्री ओलीले आफ्नो एक महिनाको तलवले खाता खोलेर आर्थिक संकलन अभियान चलाउने बताए । उनले भने हामी हाम्रो ऐतिहासिक धरोहर आफैं निर्माण गर्नु पर्छ । धरहरा म बनाउँछु भन्ने संकल्प गर्दै उक्त कार्यमा सबै नेपाली दाजुभाई दिदी बहिनी सहभागी हुन आग्रह गरे । धरहरा पुनर्निर्माणको लागि छुट्टै खाता खोलेर आर्थिक संकलन गर्ने प्रधानमन्त्रीले बताए ।
प्रधानमन्त्री ओलीले पहिलेको भन्दा अग्लो, अत्याधुनिक प्रविधिको उच्चतम प्रयोग गरेर निर्माण गरिने बताए । अव बन्ने धरहरामा भूकम्पमा परि दिवंगत भएका सबै मानिसको नाम लेखेर एतिहासिक स्कारकको स्वरुप दिने पनि जानकारी गराए ।
अन्य संरचनाहरु पुनर्निर्माणका लागि विभिन्न संघसंस्था र वैदेशिक सहायता लिने तर अदालत जस्ता संवेदनशिल भवनहरु र धरहरा निर्माणको काम नेपाली जनता र नेपाल सरकारबाटै गरिने प्रष्ट पारे ।
कार्यक्रममा एनेकपा माओवादीका अध्यक्ष पुष्पकमल दाहाल, उप्रधानमन्त्रीहरु विजय गच्चदार, भीम रावल, कमल थापा, टोपबहादुर रायमाझी, सिपी मैनाली लगायत मन्त्रीहरु र उच्च पदस्थ कर्मचारीहरुको उपस्थितिति थियो ।
४ फागुन २०७२ / ५ :१२
वि.सं.२०७२ फागुन ४ मंगलवार १७:१८ मा प्रकाशित
