काठमाडौं । भगवान गौतमबुद्धको जन्मस्थल लुम्विनी र त्यस आसपासका पर्यटकीय गन्तव्यहरुको प्रबद्र्धन गर्ने मुख्य उद्देश्यका साथ सोसाइटी अफ् ट्राभल एण्ड टूर अपरेटर्स (सोट्टो–नेपाल)ले फार्म ट्रिपको आयोजना गर्ने भएको छ ।
यही चैत ५ देखि १० गतेसम्म सञ्चालन गर्न लागिएको फार्म ट्रिप लुम्बिनी, पाल्पा, गुल्मीको रिडी–रेसुङ्गा, अर्घाखाँचीको सुपादेउराली–नरसिंह स्थान हुँदै प्युठानको स्वर्गद्वारी पुगेर समापन हुनेछ ।
फार्म ट्रिपमा ट्राभल तथा ट्रेकिङ व्यवसायी, पर्यटन बोर्डका प्रतिनिधि, पर्यटन पत्रकारहरु र सरोकारवाला व्यक्तिहरुको उपस्थिति रहने सोट्टो नेपालले जनाएको छ ।
लुम्बिनीमा अन्तर्राष्ट्रिय विमानस्थल निर्माणधिन अवस्थामा छ तापनि सो आसपासका गन्तव्यहरुको अझै प्रबद्र्धन हुन नसकिरहेको अवस्थामा यस किसिमको प्रबद्र्धनात्मक कार्यक्रम गर्न लागिएको सोट्टो नेपालका अध्यक्ष यामबहादुर खड्काको भनाई छ ।
‘आधा घण्टा लुम्विनी घुमेपछि पर्यटकहरु त्यस आसपास कहाँ जाने ? त्यसैले हामीले त्यस आसपासको गन्तव्यको प्रबद्र्धन र बजारीकरणका लागि व्यवसायी र स्थानीयलाई जागरुक गराउन यस कार्यक्रमको आयोजना गर्न लागेका हौं ।’ खड्काले भने ।
उक्त फार्म ट्रिपको समयमा प्रत्येक गन्तव्यका निजी पर्यटन व्यवसायी, सरकारी संयन्त्रका प्रतिनिधि, स्थानीय बासिन्दा तथा पत्रकारहरुसँग अन्तक्रिया कार्यक्रम पनि गरिने उनले बताए । फार्म ट्रिपको अवसरमा पाल्पाको होमस्टे प्रबद्र्धनका लागि एक रात होमस्टेमा बस्ने कार्यक्रम समेत राखिएको उनको भनाइ छ । भ्रमणले लुम्बिनी आसपासका गन्तव्य प्रबद्र्धन गर्न, बजारीकरण गर्न र पर्यटन प्याकेज निर्माणका लागि सहज हुने सोट्टो नेपालको आशा छ ।
सोट्टो नेपालले हरेक वर्ष आन्तरिक पर्यटन प्रबद्र्धन र गन्तव्यको बजारीकरणका लागि यस किसिमको कार्यक्रम संचालन गर्दै आएको छ ।
१ चैत २०७२ / ७:३९
वि.सं.२०७२ चैत १ सोमवार १९:४१ मा प्रकाशित
