काठमाण्डौं । नेपाल आयल निगमले अर्थ मन्त्रालयले तेल आपूर्तिका लागि लिएको ऋण तिर्न ताकेता गरेपछि अहिले नाफामा गएको भन्दै सरकारको १२ अर्ब ६४ करोड रुपैयाँ ऋण मध्ये ३ अर्ब रुपैयाँ तिरेको छ । निगमको ऋण अब ९ अर्ब ६४ करोड रुपैयाँ बाँकी छ ।
योसँगै आयल निगमले सरकारी ऋणलाई प्राथमिकतामा राखेर तिर्ने जानकारी दिएको छ । अर्थमन्त्रालयले नाफामा गएको बेला सरकारी ऋण तत्काल तिर्न निगमलाई निर्देशन दिएको थियो ।
अन्तर्राष्ट्रिय बजारमा कच्चा तेलको मूल्य प्रतिब्यारल ३० अमेरिकी डलरमा पुगेको छ । बजारमा कच्चा तेलको मूल्य १२ वर्षकै कममा झरेपछि निगम नाफामा गएको भन्दै गत वर्ष ९० करोड रुपैयाँ बोनस बाँड्ने निर्णय गरेको थियो । अर्थले निगमलाई सबै ऋण नतिरी बोनस नबाँड्न निर्देशन दिइसकेको छ ।
२ चैत २०७२, ११.००
वि.सं.२०७२ चैत २ मंगलवार ११:०९ मा प्रकाशित
