रुपन्देही । नयाँ शैक्षिक सत्र शुरु भए पनि यहाँ भने पचास हजारभन्दा बढी विद्यार्थीले पुस्तक पाएका छैनन् ।
जिल्ला शिक्षा कार्यालयले कोही पनि विद्यार्थी नछुटून् भनेर विद्यार्थी अभियानलाई तीव्रता दिइएको तर भर्ना भएकामध्ये ८० प्रतिशत विद्यार्थी पुस्तकविहीन छन् । रुपन्देहीमा सामुदायिक तीन सय ६२, संस्थागत (निजी) २८, धार्मिक एक सय १७ गरी सात सय ६३ विद्यालय छन् ।
शिक्षा कार्यालयका अनुसार कक्षा १० सम्म दुई लाख आठ हजार विद्यार्थी छन् । तीमध्ये सामुदायिक विद्यालयमा एक लाख २५ हजार, निजी विद्यालयमा ७१ हजार पाँच सय र अन्यमा १० हजार ६ सय विद्यार्थी विद्यार्थी छन् । निजी विद्यालयले पुस्तकको चाँजोपाँचो मिलाइसकेका छन् । सामुदायिक विद्यालयमा भने कक्षा ६ देखि १० सम्म पुस्तकको चरम अभाव देखिएको छ ।
जिल्ला शिक्षा अधिकारी टेकबहादुर थापाले जनक शिक्षा सामग्री केन्द्रले नै पुस्तक नपठाउँदा समस्या भएकाले जति सक्दो चाँडो सहज बनाउने गरी दबाब दिइएको बताए ।
उनका अनुसार रुपन्देहीमा ६६ हजार ५ सय ८७ थान पुस्तकको माग भए पनि ११ हजार ५ सय मात्रै प्राप्त भएको छ । कक्षा ६ मा १२ हजार आठ सय १३, कक्षा ७ मा १२ हजार सात सय ९१, कक्षा ८ मा १३ हजार सात सय, कक्षा ९ मा १३ हजार आठ सय ३० र कक्षा १० मा १३ हजार चार सय २५ थान पुस्तकको माग छ ।
कक्षा ६ को एउटा पनि पुस्तक आएको छैन भने कक्षा ७ देखि १० सम्ममा करीब १५ हजारको हाराहारीमा मात्रै पुस्तक आएको शिक्षा अधिकारी थापाले बताए । तथ्याङ्कअनुसार रुपन्देहीमा पुस्तकको अभाव निकै छ ।
प्रकाशितः २०७३ वैशाख ७
वि.सं.२०७३ वैशाख ७ मंगलवार १३:५९ मा प्रकाशित
