काठमाण्डौं । सिटिजन्स बैंक इन्टरनेशनलले बैशाखभित्रै हकप्रद सेयर जारि गर्ने भएको छ । बैंकले चुक्ता पुँजीको ५५ प्रतिशत हकप्रद सेयर जारि गर्न लागेको हो ।
नेपाल राष्ट्र बैंकले २०७४ असार मसान्तभित्र बाणिज्य बैंकहरुको चुक्ता पुँजी आठ अर्ब पुर्याउनु पर्ने नीति अनुसार हकप्रद जारि गरेर पुँजी बढाउन लागिएको बैंकका प्रमुख कार्यकारी अधिकृत राजनसिंह भन्डारीले जानकारी दिए ।
बैंकले हकप्रद सेयर जारी गर्न सञ्चालक तथा आधारभुत सेयरधनीबाट जम्मा गर्नु पर्ने रकमका लागि पत्रचार गरिसकेको जानकारी दिएको छ ।
बैंकले नेशनल इन्भेष्टमेन्ट एन्ड क्यापिटल मार्केटको सेयरमा कुल ६ करोड ७० लाख रुपैयाँ लगानी गरेको छ । लगानीसँगै बैंकको सहायक कम्पनीका रुपमा सिबिआइएल क्यापिटल लिमिटेडको नामबाट गत फागुनबाट कारोबार सुरु भइसकेको छ ।
बैंकका देशभर ५६ शाखा छन्, जुन प्रस्तावित सात वटै प्रदेशहरुमा फैलिएको छ । एक नम्बर प्रदेशमा सात वटा, दुई नम्बरमा ६ वटा, तीन नम्बरमा २७ वटा, चार नम्बरमा तीन वटा, पाँच नम्बरमा पाँच वटा, ६ नम्बरमा पाँच वटा र सात नम्बर प्रदेशमा तीन वटा छन् । बैंकका ८९ वटा शाखारहित बैंकिङ सेवा पनि सञ्चालनमा छन् ।
७ बैशाख २०७२, ११।००
वि.सं.२०७३ वैशाख ७ मंगलवार १४:२८ मा प्रकाशित
