काठमाण्डौं । अर्थमन्त्री विष्णु पौडेलले शनिबार संसदमा पेश गरेको वार्षिक बजेटको सूचना संसदमा पेश गर्नु अघि नै पत्रपत्रिकामा आएको भन्दै कांग्रेसले सदन अवरोध गरेपछि सत्तापक्ष त्यसको छानविनका लागि समिति गठन गर्न तयार भएको छ ।
‘सदनमा पेश गर्नु पहिले बजेटका कतिपय सूचना बाहिर प्रकाशित गर्नु संसदीय मर्यादा विपरित भएकाले उक्त कार्यको छानविन गर्न संसदीय समिति गठनका लागि सरकारसँग सहमति भएको छ,’ कांग्रेस नेता विमलेन्द्र निधिले भने।
समितिको सदस्य संख्या, त्यसको संयोजक र समितिको कार्यविधिबारे प्रमुख राजनीतिक दलका नेताहरु र सभामुखबीच छलफल भइरहेको निधिले बताए।
यसैबीच दलहरुबीच सदन खुलाउने विषयमा सहमतिको प्रयास जारी रहेकोले मंगलबार ११ बजेका लागि तय गरिएको संसद बैठक १ बजेसम्मका लागि स्थगित भएको छ। हिजो सोमबारदेखि सरकारको बजेटमाथि सदनमा हुने भनिएको सैद्धान्तिक छलफल प्रक्रिया कांग्रेसको अबरोधका कारण शुरु हुन सकेको थिएन।
१८ चैत २०७३, ११.३०
वि.सं.२०७३ जेठ १८ मंगलवार १२:४१ मा प्रकाशित
