काठमाण्डौं । बैङ्क अफ काठमाण्डू लुम्बिनी लिमिटेडले चुक्ता पूँजी पुर्याउनका लागि १ अर्ब रुपैयाँ बराबरको हकप्रद सेयर निष्कासन गर्ने भएको छ । मर्जरपछि नपुग हुन आएको चुक्ता पूँजी आन्तरिक माध्यमबाट पुर्याउन बैङ्कले त्यस्तो तयारी गरेको हो ।
गत आव २०७२/७३ र चालू आव २०७३/७४ सम्मको नाफाबाट बोनस सेयर जारी गरेपछि नपुग हुन आउने रकमका जोहो गर्न बैङ्कले हकप्रद सेयर निष्कासन गर्ने तयारी गरेको हो । बैंकले चालू आबसम्मको २ बैङ्कको नाफाबाट बोनस सेयर जारी गरेपछि रू ७ अर्ब चुक्ता हुने र नपुग हुन आउने १ अर्बका लागि हकप्रद सेयर निष्कासन गर्ने भएको हो ।
नेपाल राष्ट्र बैङ्कको निर्देशनअनुसार क वर्गका बैङ्कले २०७४ असार मसान्तसम्ममा चुक्ता पूँजी रू ८ अर्ब पुर्याउनुपर्नेछ । बैङ्क अफ काठमाण्डू र लुम्बिनी बैङ्क मिलेर बैंक अफ काठमाण्डु लुम्बिनी बनेको बैंकले असार २९ बाट एकीकृत कारोबार शुरू गरेको हो ।
२० साउन २०७३, १२।००
वि.सं.२०७३ साउन २० बिहीवार १३:२० मा प्रकाशित
