काठमाडौ । सहकारी क्षेत्रमा गत अर्थिक वर्ष २०७२/ ७३ मा दुई खर्ब दुई अर्ब बचत परिचालन भएको छ ।
सहकारी विभाग र मातहतका कार्यालयबाट आव २०७२/७३ मा सञ्चालित कार्यक्रमबारे वार्षिक समीक्षा गोष्ठीमा मुलुकलाई समृद्धिमा लैजान सरकारले अघि सारेको तीन खम्बे अर्थनीतिको मेरुदण्डको रुपमा रहेको सहकारीमा सो बचत रकम परिचालन भएको बताईएको छ ।
वित्तीय कारोबारको विवरणमा सहकारी संघ संस्थाको सेयर पुँजी ६३ अर्ब, सहकारी कोषको रकम ६ अर्ब ८० करोड रहनुका साथै लगानी एक खर्ब ८८ अर्ब रुपैंया पुगेको जानकारी दिइएको छ । मुलुकमा हाल प्रारम्भिक सहकारी संस्थाको सङ्ख्या ३३ हजार २८९ छ ।
सहकारीका ७० जिल्ला संघ , २५३ विषयगत जिल्ला संघ , २० विषयगत केन्द्रीय संघ , राष्ट्रिय सहकारी संघ र राष्ट्रिय सहकारी बैँक एक÷एक छन् ।
मुलुकभरका सहकारी संघ संस्थामा २३ लाख ९० हजार ९४९ महिला र २८ लाख, ९ हजार ८३८ पुरुष सदस्य छन् । त्यसैगरी सञ्चालक समितिमा ९१ हजार ६१८ महिला रहेको प्राप्त तथ्याङकमा उल्लेख छ । अघिल्लो वर्ष मुलुकका १०० वटा सहकारी समायोजन गरिएका थिए ।
गोष्ठि शुभारम्भ गर्दै सहकारी तथा गरिबी निवारणमन्त्री हृदयराम थानीले सहकारी क्षेत्रमा देखिएको विकृति र विसङ्गति अन्त्यका लागि कर्मचारीले एक फड्को अघि बढेमा आफू दुई फड्को अघि बढ्न प्रयास गर्ने अठोट व्यक्त गरेका छन् ।
उनले भने, “मुलुक बनाउने भावना लिएर सामूहिकरुपमा जिम्मेवार, इमान्दार र लगनशील भएर काम गर्न आवश्यक छ । तपाईहरुबाट सहयोग भएमा म १८ घन्टासम्म काम गर्न तयार छु ।”
गरिबीसँग जोडिएका योजना र कार्यक्रमलाई मन्त्रालय मातहतमा ल्याउन आफूबाट सक्दो प्रयास हुने बताउँदै मन्त्री थामीले नीति बनाउने तर कार्यान्वयमा ध्यान नदिने हाम्रो चरित्रलाई बदल्न आवश्यक रहेको बताए ।
सहकारी विभागका रजिष्टार केशवप्रसाद रेग्मीले मुलुकमा सहकारीको विकास र विस्तारसँगै विसङ्गतिसमेत भित्रिएकाले त्यसलाई हटाउन अनुगमन समयन्त्रलाई थप सुदृढ तुल्याइने प्रतिवद्धता व्यक्त गरेका थिए ।
प्रकाशित मिति ः २०७३ भदौ १२
वि.सं.२०७३ भदौ १२ आइतवार १८:३७ मा प्रकाशित
