देशभरीका सवारी साधन काठमाडौ केन्द्रित
देशभरीका सवारी साधनलाई काठमाडौँ केन्द्रित गरेर राष्ट्रिय पर्वमा सबै नेपालीलाई घर पुर्याउनेक्रममा हामी युद्धस्तरमा काम गरिरहेका छौं । यातायात क्षेत्रका सबै सरोकारवालासँग छलफल गरी सरकारलाई सडक सुधारका कुरा गरेका छौं । सडकको कारणले अहिले पनि अन्यौलता भएपनि हामी हाम्रो काममा नियमित लागिरहेको परिस्थिति छ ।
यातायात मन्त्रीले सडक सुधार्ने प्रतिबद्धता जनाएपछि…
हिजो नेपाल राष्ट्रिय यातायात व्यवसायी महासंघको आकस्मिक बैठक बसेर मुलुकभरिकै सबै सवारी साधनलाई राजधानी केन्द्रित गर्ने निर्णय गर्यौं । र हिजै मन्त्रालयमा गएर भौतिक योजना तथा यातायात मन्त्री रमेश लेखक सँग महत्वपूर्ण कुराकानी पनि भयो । कलंकी–नागढुंगाको सडकको खाल्डाखुल्डीलाई अस्थायीरुपमा भएपनि पुर्ने र सहज यात्राको वातावरण बनाउने, कलंकी मकालु पेट्रोलपम्प भएर नागढुंगा निस्कने सडकलाई पनि संचालनमा ल्याउन र त्यसको अस्थाई सुधार गर्ने, खाल्डाहरु पुर्ने, मुग्लिन–नारायणघाट खण्डमा यात्रुलाई अप्ठेरो पर्न नदिने वातावरण मिलाउने भनेर मन्त्रीले विश्वास दिलाउनुभएको छ । मन्त्रीले सडक विभागका महानिर्देशकलाई निर्देशन दिएर कलंकी–नागढुंगाको सडक, मुग्लीन–नारायणघाटको सडक र देशैभर भएको खाडल पुर्ने काम सक्न भन्नुभएको छ । त्यहाँ भएका खाल्डालाई गिट्टी, वालुवाले पुरेर अस्थाई रुपमा सडक सम्म बन्नेछ ।
८ लाख मानिस घर गईसके
आजसम्म करिब ८ लाख मानिस त घर गईसके । अब ४÷५ दिन ठूलो अभ्यास गर्नुपर्नेछ । यात्रुहरु र सरोकारवालामा आक्रोस नबन्ने वातावरण बनाई संयमित ढंगले घर पुर्याउनु हामी व्यवसायी, सरकार, मजदुर देखि सबै यात्रु, उपभोक्ताको पनि दायित्व हो ।
संघ संस्था मार्फत तेल हालेर भएपनि सेवा दिन्छौं
सबै उपभोक्ताले आफ्नो–आफ्नो ठाउँबाट भूमिका खेलौं भनेर भन्न चाहन्छु । संघ संस्था मार्फत तेल हालेर भएपनि देशभरका सवारी साधनले वान वे (एकतर्फी) यात्रु बोक्ने काम हुन्छ । सेवा दिन्छौं । सबै सवारी राजधानी आउने वातावरण बनाउनेछौं । यात्रुहरु घर पुग्न पाउनुहुन्छ ।
नागढुंगा–नौबिसे खण्डमा गाडी बिग्रेमा पन्छाउने हेभि इकुपमेन्ट खोई सरकार ?
नागढुंगा–नौबिसेमा गाडी बिग्रेर बसेको हुनसक्छ । त्यहाँ हेभि इकुपमेन्ट लगेर बिग्रेका सवारीलाई हटाएर राख्ने व्यवस्था गर्ने भनिएको थियो । तर सरकारी निकायले त्यो गरेको छैन । हामी तत्काल त्यो व्यवस्था गराउन पनि सरकारसँग आग्रह गर्दछौं । साथै मुलुकभरका यातायात व्यवसायी, मजदुर, चालक, परिचालकले संयमित ढंगबाट आफ्नो दायित्व पूरा गर्न र उत्तेजित नभई काम गर्न निर्देशन पनि गर्दछु ।
एक हप्ताको पर्व क्राइसिस म्यानेज हुन्छ
विगतमा नाकाबन्दीका कारण भएको क्राईसिसलाई पनि हामीले म्यानेज (व्यवस्थापन) गरेकै हो । अहिले पर्वका बेला यो एक हप्ताको पर्व क्राईसिस हो । सबैको समन्वयकारी भूमिका भएमा यातायात व्यवसायीले यो क्राईसिस म्यानेज गर्नेछ ।
विगतका दशैंमा जस्तो छतमा यात्रुहरु हुँदैनन्
एक हप्ताको अबधिमा करिब २० लाख यात्रुलाई उपत्यका बाहिर लैजाने कुरा सामान्य कुरा छैन । त्यसकारण सबै क्षेत्रको समन्वयकारी भूमिका चाहिन्छ । तर विगतका दशैंमा जस्तो छतमा यात्रुहरु हुँदैनन् । गाडीभित्र व्यवस्थित ढंगले र यात्रुहरुलाई दुर्घटनारहित ढंगबाट गन्तव्यमा पुर्याउन हामीले प्रयास गरिरहेका छौं । त्यो काम हामी गर्छाै । यसपाली कुनैपनि गाडीका हुटमा÷छतमा यात्रु हुँदैनन्, बस्दैनन् ।
प्रकाशित मितिः २०७३ असोज 18
वि.सं.२०७३ असोज १८ मंगलवार ११:४३ मा प्रकाशित