एजेन्सीः अमेरिकन राष्ट्रपतीय चुनावका रिपब्लिकन उम्मेद्वार डोनाल्ड ट्रम्पको चुनावी अभियानको तिब्रतासंगै एक पछि अर्को काण्डहरु पनि सार्वजनिक हुन थालेको छ । उनको पछिल्लो काण्ड एक महिलालाई विमान भित्रै दुव्र्यवहार गरेको सार्वजनिक भएको छ ।
सन् २००५ मा ट्रम्पले महिलाका विषयमा अश्लिल शब्द बोलेको भनेर उनको पार्टीभित्र र बाहिरबाट आलोचना भइरहेका बेला ट्रम्पको अर्को महिला हिंसाको घटना सार्वजनिक भएको हो ।
पछिल्ला दिनमा ट्रम्पको हिंसामा परेका महिला खुल्न थालेका छन् । अमेरिकी सञ्चार माध्यमले ट्रम्पको हिंसामा परेका महिलालाई खोजी खोजी स्टोरी गर्न थालेपछि उनको चुनाव यात्रामा अवरोध सिर्जना हुन थालेको छ । यसको फाइदा डेमोक्याटिक पार्टीकी राष्ट्रपतीय उम्मेदवार हिलारी क्लिन्टनले लिइराखेकी छिन् ।
पार्टी भित्रबाटै ट्रम्पको चरित्रमाथि प्रश्न उठाउदै शीर्ष नेताले मत नदिने घोषणा गरेको अवस्थामा पुनः महिला हिंसा सम्बन्धी नयाँ तथ्य सार्वजनिक भएको हो ।
एक महिलाले ट्रम्पले विमानभित्रै आफ्ना शरीरका संवेदनशील अंगमा हात पुर्याएको बताएको खबरले अमेरिकन मिडियामा हंगामा मच्चिएको छ ।
ट्रम्पले चलिरहेको विमानमा दुव्र्यवहार गरेकी ७४ वर्षीया महिला जेसिका लिड्सले न्युयोर्क टाइम्ससँग भनेकी छिन्, ‘न्युयोर्कका लागि उडेको विमानको प्रथम श्रेणीको क्याबिनमा थिएँ । ट्रम्पले कुम उचालेर मलाई छुन सुरु गरे ।’
त्यत्तिबेला उनी ३८ वर्षकी थिइन् । ट्रम्पले उनलाई सामान्य तरिकाले छुन मात्र नखोजेर संवेदनशील अंगसमेत समातेको खुलासा गरेकी छिन् । ‘उनी एक अक्टोपसजस्तै थिए, उनका हात मेरो शरीरका हरेक ठाउँमा थिए,’ लिड्सले भनेकी छिन्, ‘त्यो एउटा हमला थियो ।’
त्यस्तै, अर्की एक अमेरिकन महिला रैचल क्रुक्सले समेत ट्रम्पले आफूलाई दुव्र्यवहार गरेको बताएकी छिन् । एक कम्पनीकी रिसेप्सनिस्ट महिलाले ट्रम्पले लिफ्टमा चुम्बन गरेको बताएकी हुन् ।
ट्रम्पले दुव्र्यवहार गरेकी रैचल त्यत्तिबेला २२ वर्षकी थिइन् । उनी ट्रम्प टावरमा बायरक ग्रुपको रियल स्टेट इन्भेस्टमेन्ट एण्ड डेभलपमेन्ट कम्पनीको रिसेप्सनको रुपमा काम गर्थिन् ।
न्योयोर्क टाइम्स सँग रैचलले भनेकी छिन्, ‘उसले सिधै मेरो मुखमा चुम्बन गर्यो । यो हिंसा हो भन्ने महसुस हुन्छ, म निरीह थिएँ, उसले मलाई त्यहाँ जे पनि गर्न सक्थ्यो ।’ स्रोत : अन्नपूर्ण पोस्ट
२७ असोज २०७३
वि.सं.२०७३ असोज २७ बिहीवार १३:१९ मा प्रकाशित